Markmið: Að einfalda regluverk á sviði sjávarútvegs og fiskeldis.

Helstu breytingar og nýjungar: Lagt er til að felld verði brott 22 lög sem eru úrelt eða óþörf. Lagt er til að leyfisskylda til dragnótaveiða verði felld niður og þess í stað verði fjallað um veiðarnar í reglugerð. Lagt er til að heimild ráðherra til að veita krókaaflamarksbátum leyfi til botndýraveiða með þeim veiðarfærum sem til slíkra veiða þarf og til hrognkelsaveiða í net falli brott en þess í stað verði fjallað um veiðarnar í reglugerð. Þá er lagt til að úrskurðarnefnd um ólögmætan sjávarafla verði lögð af. Lagt er til að úrelt bráðabirgðaákvæði verði felld niður. Einnig er lögð til einföldun á stjórnsýslu skyndilokana. Lagt er til að skylda Fiskistofu til að leggja til sérstakar afladagbækur verði afnumin. Auk þess er lagt til að dregið verði úr skýrsluskilum fiskeldisfyrirtækja, sem framleiða minna en 20 tonn árlega. Þá er lögð til einföldun á stjórnsýslumeðferð veiðitækja, sem notuð hafa verið erlendis.

Breytingar á lögum og tengd mál: Verði frumvarpið óbreytt að lögum verða 22 lög felld brott og breytingar verða á 12 lögum.

Kostnaður og tekjur: Gert er ráð fyrir óverulegum áhrifum á fjárhag ríkissjóðs.

Aðrar upplýsingar: Sáttmáli Framsóknarflokks, Sjálfstæðisflokks og Vinstrihreyfingarinnar – græns framboðs um ríkisstjórnarsamstarf og eflingu Alþingis.

Afgreiðsla: Samþykkt með fáeinum breytingum, m.a. var hætt við að fella niður leyfisskyldu til dragnótaveiða.

Efnisflokkar: Heilsa og heilbrigði: Heilbrigðiseftirlit  |  Atvinnuvegir: Landbúnaður  |  Atvinnuvegir: Sjávarútvegur