Markmið: Að gera breytingar á samkeppnislögum sem bæti framkvæmd þeirra og samræmi hluta laganna gildandi EES-rétti. Stefnt er að einföldun á tilteknum atriðum við framkvæmd laganna, einkum hvað varðar bann við samkeppnishömlum og reglur um meðferð samrunamála. Frumvarpið er hluti af ráðstöfunum ríkisstjórnarinnar vegna lífskjarasamninga sem undirritaðir voru í apríl 2019.

Helstu breytingar og nýjungar: Verði frumvarpið að lögum verður gildistími ráðningarsamnings forstjóra Samkeppniseftirlitsins fimm ár en er ótímabundinn nú. Lagt er til að hlutaðeigandi fyrirtæki meti sjálf hvort þau uppfylla lögbundin skilyrði vegna undanþága frá banni við samstarfi fyrirtækja. Enn fremur er lagt til að heimild Samkeppniseftirlitsins til íhlutunar án brots falli brott. Þá er lagt til að veltumörk tilkynningarskyldra samruna verði hækkuð og að þau skilyrði sem þurfa að vera uppfyllt til að heimilt sé að tilkynna samruna með styttri tilkynningu séu rýmkuð. Gert er ráð fyrir að veltumörk, sem skilyrði fyrir heimild Samkeppniseftirlitsins til að krefja samrunaaðila um samrunatilkynningu, verði hækkuð. Heimild Samkeppniseftirlitsins til að kalla eftir samrunatilkynningu á við þá samruna sem ná ekki veltumörkum tilkynningarskyldra samruna. Sú hækkun er hlutfallslega jafn mikil og hækkun á veltumörkum tilkynningarskyldra samruna þannig að neðri veltumörkin fylgja þeim efri. Að auki er gert ráð fyrir að almennur tímafrestur til rannsóknar samrunamála verði 115 dagar í tveimur fösum. Lagðar eru til breytingar í tengslum við norrænan samstarfssamning í samkeppnismálum frá árinu 2017, sem veitir Samkeppniseftirlitinu heimildir til að framkvæma húsleitir, upplýsingaöflun og upplýsingaskipti að beiðni samkeppnisyfirvalda í Noregi, Danmörku, Svíþjóð, Finnlandi, Grænlandi og í Færeyjum.

Breytingar á lögum og tengd mál: Samkeppnislög, nr. 44/2005.

Kostnaður og tekjur: Talið er að frumvarpið hafi takmörkuð en varanleg áhrif á ríkissjóð verði það samþykkt óbreytt og birtist þau í aukinni fjárþörf til starfsemi Samkeppniseftirlitsins.

Aðrar upplýsingar:

Afgreiðsla: Samþykkt með fáeinum breytingum.

Efnisflokkar: Lög og réttur: Löggæsla og eftirlit  |  Erlend samskipti: Norræn málefni  |  Atvinnuvegir: Viðskipti