432. mál: Virðisaukaskattur og tekjuskattur

Samantekt

Markmið: Að greiða fyrir orkuskiptum í samgöngum með því að innleiða nýjar og lengja núverandi tímabundnar skattaívilnanir vegna bifreiða, bifhjóla, léttra bifhjóla og reiðhjóla sem ganga fyrir vistvænni orku og vegna búnaðar til að hlaða rafgeyma rafknúinna bifreiða. Að draga úr notkun jarðefnaeldsneytis með tilheyrandi útblæstri gróðurhúsalofttegunda og auka hlutdeild endurnýjanlegra orkugjafa í orkunotkun landsmanna vegna samgangna.

Helstu breytingar og nýjungar:

Frumvarpið felur í sér tíu skattkerfisbreytingar. Varða níu þeirra breytingar á ákvæðum virðisaukaskattslaga, þ.á.m. bráðabirgðaákvæði XXIV um heimild til niðurfellingar á virðisaukaskatti af nýjum rafmagns-, vetnis og tengiltvinnbifreiðum. Lagt er til að lengdur verði gildistími heimilda til að fella niður eða lækka virðisaukaskattsinnheimtu af ökutækjum sem nýta vistvæna orku. Nýmæli er að bifhjól, létt bifhjól og reiðhjól sem knúin eru raforku eða vetni verða tímabundið undanþegin virðisaukaskatti. Frumvarpið varðar einnig niðurfellingu virðisaukaskatts að hluta eða í heild vegna kaupa og uppsetningar á hleðslubúnaði í nýju og eldra íbúðarhúsnæði. Einnig er gert ráð fyrir nýrri heimild í lögum um tekjuskatt til að fyrna að fullu á kaupári, niður að niðurlagsverði, ökutæki sem gengur fyrir metani, metanóli, raforku eða vetni og notað er að öllu leyti í atvinnuskyni í skattskyldri starfsemi lögaðila eða sjálfstætt starfandi einstaklings.

Breytingar á lögum og tengd mál: Lög um virðisaukaskatt, nr. 50/1988.

Lög um tekjuskatt, nr. 90/2003.

Kostnaður og tekjur: Frumvarpið hefur ekki í för með sér útgjöld fyrir ríkissjóð en óhjákvæmilega munu skattstyrkirnir sem það felur í sér leiða til tekjutaps hins opinbera. Ekki er lagt mat á það í frumvarpinu hversu mikið tekjutapið gæti orðið.

Aðrar upplýsingar:

Aðgerðaáætlun í loftslagsmálum 2018–2030

Sáttmáli Framsóknarflokks, Sjálfstæðisflokks og Vinstrihreyfingarinnar – græns framboðs um ríkisstjórnarsamstarf og eflingu Alþingis

Þingsályktun um aðgerðaáætlun um orkuskipti nr. 18/146

Afgreiðsla: Samþykkt með nokkrum breytingum en þeim helstum að fjárhæðarmörk ívilnunar vegna tengiltvinnbifreiða lækka í nokkrum áföngum og gildistími hennar var framlengdur til 31. desember 2022. Einnig var hámarksfjöldi þeirra bíla sem notið geta ívilnunarinnar hækkaður í 15.000. Þá var hámark á fjölda þeirra innfluttu bifreiða í almenningsakstri sem nýta eingöngu metan, metanól, rafmagn eða vetni sem orkugjafa hækkað í 120.

Efnisflokkar: Umhverfismál: Mengun | Umhverfismál: Orkumál og auðlindir | Samgöngumál: Samgöngur | Hagstjórn: Skattar og tollar | Atvinnuvegir: Viðskipti

432 | Virðisaukaskattur og tekjuskattur (vistvæn ökutæki o.fl.)

Þingskjöl

Umsagnir