320. mál: Almennar íbúðir

320 | Almennar íbúðir (hækkun tekju- og eignamarka leigjenda o.fl.)

150. þing | 1.11.2019 | Lagafrumvarp | Stjórnarmál Samþykkt

Umsagnir: 15 | Þingskjöl: 6 | Staða: Lokið

Samantekt

Markmið: Að koma til framkvæmda tillögum 2, 4, 5, 6 og 7 í skýrslu átakshóps um húsnæðismál.

Helstu breytingar og nýjungar:

Lagt er til að tekju- og eignamörk leigjenda almennra íbúða verði hækkuð þannig að hærra hlutfall landsmanna eigi kost á almennum íbúðum. Einnig eru lagðar til ýmsar breytingar til að lækka fjármagnskostnað stofnframlagshafa og gert er ráð fyrir að heimilt verði að gera samninga um úthlutun stofnframlaga til allt að þriggja ára í senn til þess að auka fyrirsjáanleika í verkefnum viðkomandi. Þá er lagt til að liðkað verði fyrir veitingu stofnframlaga vegna nýbyggingarframkvæmda og að sveitarfélögum verði gert fært að sækja um stofnstyrki til byggingarverkefna sem þegar eru hafin að nánari skilyrðum uppfylltum. Enn fremur eru lagðar til breytingar til að styðja við uppbyggingu leiguíbúða á svæðum þar sem misvægi ríkir á milli byggingarkostnaðar og markaðsverðs íbúðarhúsnæðis og þar sem góðar almenningssamgöngur eru fyrir hendi.

Breytingar á lögum og tengd mál: Lög um almennar íbúðir, nr. 52/2016.

Lög um félagsþjónustu sveitarfélaga, nr. 40/1991.

Kostnaður og tekjur: Ekki er gert ráð fyrir að útgjöld fyrir ríkissjóð verði umfram það sem þegar hefur verið gert ráð fyrir í fjármálaáætlun 2020–2024.

Aðrar upplýsingar:

Tillögur átakshóps um húsnæðismál.

Lífskjarasamningurinn 2019-2022 (kynning).

Aðgerðir ríkisstjórnarinnar til stuðnings lífskjarasamningum aðila vinnumarkaðarins.

Afgreiðsla: Samþykkt með nokkrum breytingum. T.d. var lögum um húsnæðismál, nr. 44/1998, breytt þannig að tekju- og eignamörk vegna íbúða sem veitt var lán til fyrir 10. júní 2016, eða við gildistöku laga um almennar íbúðir, og eru ætlaðar tilgreindum hópi leigjenda sem eru undir ákveðnum tekju- og eignamörkum, miðist við uppreiknaðar fjárhæðir tekju- og eignamarka gildandi laga um almennar íbúðir.

Efnisflokkar: Samfélagsmál: Félagsmál | Hagstjórn: Fjárreiður ríkisins | Stjórnarskipan og stjórnsýsla: Sveitarstjórnarmál

Þingskjöl

Umsagnir