Markmið: Að efla stjórnsýslu, stefnumótun og framkvæmd húsnæðis- og mannvirkjamála, skerpa á stjórnsýslu byggingarframkvæmda, hagræða í rekstri hins opinbera og auka samstarf við sveitarfélög og aðra hagsmunaaðila á sviði húsnæðismála. Að stuðla að auknu húsnæðisöryggi landsmanna og stöðugleika á húsnæðismarkaði. Að draga úr áhættu ríkisins vegna aukinna uppgreiðslna hjá Íbúðalánasjóði og gera Íbúðalánasjóði kleift að sinna betur lögbundnum verkefnum.
Helstu breytingar og nýjungar:
Lagt er til að Íbúðalánasjóði verði skipt upp þannig að sá hluti starfsemi sjóðsins sem snýr að útgáfu skuldabréfa Íbúðalánasjóðs (HFF-bréfa), eldri lánastarfsemi og fjárstýringu eigna utan lánasafns, svo sem lausafjár og annarra verðbréfa, verði eftir í Íbúðalánasjóði sem mun fá nafnið ÍL-sjóður. Einnig er lagt til að sett verði á fót ný stofnun, sem fær heitið Húsnæðis- og mannvirkjastofnun, og að til hennar flytjist verkefni Mannvirkjastofnunar og verkefni þess hluta Íbúðalánsjóðs sem skilinn verður frá ÍL-sjóði. Þá er lagt til að stofnaður verði Húsnæðissjóður, sem taka á við þeim eignum og réttindum Íbúðalánasjóðs sem ekki verða eftir í ÍL-sjóði.
Breytingar á lögum og tengd mál: Um er að ræða ný lög en við gildistöku laganna verða breytingar á 35 öðrum lögum.
Kostnaður og tekjur: Gert er ráð fyrir hagræðingu að fjárhæð um 100 milljón kr. vegna sameiningu hluta Íbúðalánasjóðs og Mannvirkjastofnunar.
Núverandi framlög til Íbúðalánasjóðs á fjárlögum vegna félagslegra útlána fara til ÍL-sjóðs eftir uppskiptinguna, samtals um 600 milljónir kr.
Áætlanir gera ráð fyrir að lán Húsnæðis- og mannvirkjastofnunar til fjármögnunar almennra íbúða geti verið allt að 35 milljarðar kr. miðað við uppbyggingu kerfisins til ársins 2022. Verði lánin fjármögnuð af Húsnæðissjóði með lántöku sjóðsins frá ríkissjóði, frekar en frá ÍL-sjóði, þyrfti ríkissjóður að taka þá fjárhæð að láni á markaði. Ávöxtunarkrafa á löngum verðtryggðum ríkisskuldabréfum hefur undanfarið verið á bilinu 0,7–0,8%. Ef gert er ráð fyrir 0,8% vaxtagreiðslum auk 2,5% verðbólgu í samræmi við verðbólgumarkmið Seðlabanka Íslands, væru árlegar vaxtagreiðslur vegna lántöku ríkisins þá um 1,2 milljarðar kr. á ári. Gert er ráð fyrir að lánað yrði áfram til Húsnæðissjóðs á 2% verðtryggðum vöxtum og væru vaxtagreiðslur sjóðsins til ríkisins þá um 1,6 milljarðar kr. á ári. Miðað við þetta mundu hreinar vaxtatekjur ríkissjóðs hækka um u.þ.b. 400 milljónir kr. á ári.
Afgreiðsla: Samþykkt með minni háttar breytingum.
Efnisflokkar:
Samfélagsmál: Félagsmál
|
Umhverfismál: Umhverfisstjórn og náttúruvernd
|
Atvinnuvegir: Viðskipti
150. þing
| 1.11.2019
| Lagafrumvarp
| Stjórnarmál
Samþykkt