Ferill 194. máls. Aðrar útgáfur af skjalinu: PDF - Word Perfect.
156. löggjafarþing 2025.
Þingskjal 215 — 194. mál.
Tillaga til þingsályktunar
um framfylgd ályktana Vestnorræna ráðsins árið 2024.
Frá Íslandsdeild Vestnorræna ráðsins.
Alþingi ályktar að skora á ríkisstjórnina að vinna að framkvæmd tveggja ályktana Vestnorræna ráðsins sem samþykktar voru á ársfundi ráðsins 27.–28. ágúst 2024, annars vegar um að styrkja samstarf Færeyja, Grænlands og Íslands hvað varðar málstefnu og máltækni (nr. 1/2024) og hins vegar um samstarf vestnorrænu landanna um notkun gervigreindar og varðveislu og eflingu vestnorrænna tungumála (nr. 2/2024).
Greinargerð.
Í þeirri fyrri (nr. 1/2024) er lagt til að samstarf Íslands, Færeyja og Grænlands hvað varðar málstefnu og máltækni verði styrkt. Tryggja þurfi lífsþrótt vestnorrænu málanna og auka áherslu á fjárfestingu í mál- og máltækniþróun. Í greinargerð fyrir ályktuninni eru settir fram fimm punktar sem vinna á að:
1. Móta stefnu fyrir frekari þróun máltækni í færeysku og á grænlensku.
2. Styrkja samstarf í rannsóknum og þróun máltækni og samnýta tækifæri og sérfræðiþekkingu í löndunum.
3. Hefja samvinnu um námskeið og fræðslu til að byggja upp og viðhalda hæfni og sérfræðiþekkingu í löndunum.
4. Koma á samstarfi varðandi löggjöf um efnisöflun og gagnasöfn.
5. Hefja samstarf á pólitískum vettvangi til að stuðla að aðgengi málanna á stafrænum vettvangi.
Í seinni ályktuninni (nr. 2/2024) er lagt til að menntamálaráðherrar vestnorrænu landanna fundi um stefnu landanna í málefnum tungumála og gervigreindar og kanni hvort grundvöllur sé fyrir auknu samstarfi. Þá eru ráðherrarnir hvattir til að kortleggja þá þróun og uppbyggingu sem á sér stað í hverju landi, hvetja til aukinnar samvinnu meðal aðila á þessu sviði og greiða götu þeirra í slíku samstarfi.
Vestnorrænu tungumálin þrjú, íslenska, færeyska og grænlenska, eru töluð á litlum málsvæðum og það er mjög mikilvægt að þau haldi í við öra þróun í stafvæðingu og máltækni. Dýrt getur reynst að fjárfesta í þeirri tækni og hún er mjög fljót að úreldast. Samstarf vestnorrænu landanna þar sem þau miðla reynslu sinni og tækni og hugsanlegt samstarf í samningaviðræðum við stór og alþjóðleg tæknifyrirtæki getur því reynst afar dýrmætt og mikilvægt.
