Ferill 902. máls. Aðrar útgáfur af skjalinu: PDF - Word Perfect.
154. löggjafarþing 2023–2024.
Þingskjal 1818 — 902. mál.
Svar
dómsmálaráðherra við fyrirspurn frá Hafdísi Hrönn Hafsteinsdóttur um húsnæði mennta- og starfsþróunarseturs lögreglunnar.
1. Hvernig er húsnæði mennta- og starfsþróunarseturs lögreglunnar að Krókhálsi 5a nýtt að öðru leyti en fyrir þjálfun lögreglumanna?
Mennta- og starfsþróunarsetur lögreglunnar (MSL) er staðsett á Krókhálsi 5a og b, 110 Reykjavík. Heildarstærð húsnæðisins er um 2.400 fermetrar og nýtir MSL um 1.800 fermetra undir sína starfsemi.
Leyfadeild lögreglunnar á höfuðborgarsvæðinu og varastöð fjarskiptamiðstöðvar ríkislögreglustjóra og Neyðarlínunnar nýta hluta húsnæðisins undir sína starfsemi. Auk þess er vinnuaðstaða fyrir starfsfólk Háskólans á Akureyri sem kemur að kennslu í lögreglufræði við skólann. Þá hefur verkefni er tengist prófun á ytri landamærahliðum í tengslum við Schengen-samstarfið tímabundna aðstöðu í húsnæðinu.
MSL er í góðu samstarfi við Slökkvilið höfuðborgarsvæðisins varðandi fræðslu og þjálfun lögreglu og slökkviliðs og reglulega fer fram þjálfun og kennsla í húsnæði beggja viðbragðsaðila.
Enn fremur hefur MSL verið falið að sinna utanumhaldi og starfrækslu Fangavarðaskólans árin 2024 og 2025 og fer starfsemi skólans öll fram í húsnæðinu að Krókhálsi 5a og b.
2. Hver er mánaðarlegur kostnaður við rekstur húsnæðisins árið 2024?
Meðalkostnaður fyrstu fjóra mánuði ársins 2024 við leigu og rekstur húsnæðisins er um 6 milljónir króna á mánuði.
3. Hefur annar betri húsakostur verið skoðaður fyrir starfsemi mennta- og starfsþróunarseturs lögreglunnar?
Ekki að svo stöddu. Aðstaða fyrir MSL var fyrirhuguð í sameiginlegu húsnæði viðbragðsaðila.
