Ferill 895. máls. Aðrar útgáfur af skjalinu: PDF - Word Perfect.
154. löggjafarþing 2023–2024.
Þingskjal 1889 — 895. mál.
Svar
heilbrigðisráðherra við fyrirspurn frá Berglindi Ósk Guðmundsdóttur um símsvörun í síma 1700.
1. Hvaða greining liggur að baki ákvörðun um að færa símsvörun í síma 1700 utan hefðbundins opnunartíma heilsugæslustöðva til Upplýsingamiðstöðvar heilsugæslunnar frá Læknavaktinni?
Lengi hefur verið unnið að því í ráðuneytinu að efla og samþætta vegvísun, ráðgjöf og leiðbeiningar í heilbrigðiskerfinu, m.a. til að stýra og draga úr álagi á heilbrigðisstarfsfólk og til að bæta þjónustu við notendur. Jafnframt hefur verið reiknað með að heilbrigðisráðgjöf og vegvísun um heilbrigðiskerfið sem staðsett er á einum stað skili skýrari og betri skilaboðum til almennings. Þannig megi auka gæði, samlegð og skilvirkni í þjónustunni.
Í nóvember 2022 skipaði ráðherra starfshóp um fyrirkomulag vegvísunar í heilbrigðiskerfinu. Í skipunarbréfi var starfshópnum falið að gera tillögu að fyrirkomulagi vegvísunar í heilbrigðiskerfinu til framtíðar með það að markmiði að tryggja almenningi greiðar og aðgengilegar upplýsingar um hvert leita skuli eftir heilbrigðisþjónustu í samræmi við þörf og aðstæður hvers og eins hverju sinni. Hópurinn hafði það að leiðarljósi að með samræmdri upplýsingagjöf og aukinni samvinnu þjónustuveitenda megi bæta þjónustu við sjúklinga og dreifa álagi á heilbrigðiskerfið. Starfshópnum var jafnframt falið að greina hvernig almenningur nýtti sér þá vegvísun sem þá var fyrir hendi og meta fýsileika þess að auka leiðbeiningar og fræðslu fyrir almenning um þá þjónustu sem var í boði á mismunandi stöðum innan heilbrigðiskerfisins.
Í starfshópnum voru fulltrúar frá embætti landlæknis, Upplýsingamiðstöð heilsugæslunnar, Landspítala, Sjúkratryggingum Íslands, Læknavaktinni, Samtökum fyrirtækja í velferðarþjónustu, Landssamtökum heilbrigðisstofnana, Samtökum heilbrigðisfyrirtækja, sjálfstætt starfandi heilsugæslum, Þróunarmiðstöð íslenskrar heilsugæslu, Heilsugæslu höfuðborgarsvæðisins og ráðuneytinu.
Hópurinn skilaði skýrslu með tillögum í apríl 2023 og má finna skýrsluna á vefsíðu ráðuneytisins.
Ein af fjórum tillögum hópsins í kjölfar greiningar á stöðunni var að þjónusta fjarráðgjafar og vegvísunar yrði sameinuð í eina miðstöð sem sæi um alla vegvísun, allt frá upplýsingum á netinu til símsvörunar og netspjalls.
Ákvörðun ráðherra tók mið af þessari greiningu starfshópsins og var Sjúkratryggingum Íslands í kjölfarið falið að ganga frá samkomulagi um breytingar á samningi stofnunarinnar við Læknavaktina. Breytingarnar áttu að taka mið af því að dregið yrði úr umfangi þjónustunnar í upphafi árs 2024 og að þjónustan yrði að fullu komin til Upplýsingamiðstöðvar heilsugæslunnar 1. apríl 2024. Að höfðu samráði allra aðila (ráðuneytisins, Læknavaktarinnar og Upplýsingamiðstöðvar) var ákveðið að flýta yfirfærslunni um einn mánuð og að símaráðgjöf yrði alfarið á höndum Upplýsingamiðstöðvar frá 1. mars 2024.
2. Hver verður kostnaður Upplýsingamiðstöðvar heilsugæslunnar við þessa yfirfærslu?
Samningur Sjúkratrygginga Íslands og Læknavaktarinnar sem gilti frá árinu 2017, um rekstur heilbrigðisráðgjafar og vegvísun í síma, tók til þjónustu allan sólarhringinn alla daga ársins. Hinn 1. september 2022 tók Upplýsingamiðstöð heilsugæslunnar við þjónustu á dagvinnutíma alla virka daga. Símsvörun var þá á hendi Upplýsingamiðstöðvar stóran hluta sólarhringsins en Læknavaktin annaðist enn símsvörun frá kl. 17 til kl. 23 á virkum dögum og frá kl. 8 til kl. 23 um helgar og á helgidögum. Líkt og að framan greinir tók Upplýsingamiðstöðin alfarið við fjarráðgjöf og vegvísun í síma 1700 1. mars sl.
Eftir þá breytingu fékk Upplýsingamiðstöðin 60.138.794 kr. fyrir árið 2024 og mun fá 68.849.760 kr. árið 2025 þar sem Upplýsingamiðstöðin mun sinna þjónustunni allt það ár. Munur á fjárhæð skýrist af því að yfirfærslan tók ekki að fullu gildi fyrr en í marsmánuði 2024.
