Ferill 843. máls. Aðrar útgáfur af skjalinu: PDF - Word Perfect.
154. löggjafarþing 2023–2024.
Þingskjal 2137 — 843. mál.
Svar
heilbrigðisráðherra við fyrirspurn frá Hákoni Hermannssyni um gjaldskrá vegna tannréttinga barna með skarð í vör eða tanngarði.
1. Stendur til að breyta gjaldskrá Sjúkratrygginga þannig að hún nái yfir tannréttingameðferðir fyrir börn með skarð í vör eða tanngarði? Ef svo er, með hvaða hætti og hvenær?
Í IV. kafla reglugerðar nr. 451/2013, um þátttöku sjúkratrygginga í kostnaði sjúkratryggðra við tannlækningar, eru ákvæði um aukna þátttöku sjúkratrygginga í kostnaði við tannlækningar og tannréttingar vegna alvarlegra afleiðinga meðfæddra galla, slysa og sjúkdóma. Greiðsluþátttaka sjúkratrygginga samkvæmt kaflanum tekur m.a. til kostnaðar vegna nauðsynlegra tannlækninga og tannréttinga vegna skarðs í efri tannboga eða klofins góms, harða eða mjúka. Skv. 16. gr. reglugerðarinnar taka Sjúkratryggingar Íslands þátt í kostnaði við tannlækningar og tannréttingar skv. 14. og 15. gr., en greiðsluþátttaka nemur 95% kostnaðar samkvæmt gjaldskrá.
Gjaldskráin nær yfir þær meðferðir sem börn með skarð í tannboga eða klofinn góm þurfa á að halda. Í tengslum við samning Sjúkratrygginga við tannréttingasérfræðinga um tannréttingar sem undirritaður var þann 27. júlí 2023, var farið í endurskoðun á gjaldskrá og aðgerðaskrá með það að leiðarljósi að hún endurspeglaði þörf fyrir þjónustuna ásamt því að draga úr takmörkunum og umsóknarskyldu vegna einstakra tannlæknaverka. Í þeim tilfellum þar sem aðgerðaskrá eða gjaldskrá kann að takmarka mögulegar veittar meðferðir senda tannlæknar umsókn um rýmkun skilyrða fyrir þau tilteknu tilvik og eru þær umsóknir nær undantekningarlaust samþykktar. Þess má einnig geta að endurskoðuð aðgerðaskrá, sem tekur gildi síðar á árinu, mun rýmka skilyrði fyrir notkun ýmissa gjaldaliða sem kann að draga úr þörfinni fyrir slíkar umsóknir. Samningurinn kveður einnig á um samstarfsnefnd sem stuðlar að auknu samstarfi og samtali milli hagaðila og er ætlað að taka á álitamálum sem upp koma varðandi framkvæmd samningsins, svo sem atriði sem tengjast gjaldaliðum og aðgerðaskrá.
Með samningnum hækkuðu styrkir við almennar tannlækningar úr að hámarki 150.000 kr. í 430.000 kr. í takt við áherslu ríkisstjórnarinnar um að draga úr greiðsluþátttöku fólks fyrir heilbrigðisþjónustu og stuðla þannig að jöfnu aðgengi. Samningurinn byggist á því að í gildi sé samstarfssamningur milli Sjúkratrygginga Íslands og Tannlæknafélags Íslands. Þann 13. júní sl. var 5 ára samningur um þjónustu tannlækna undirritaður og staðfestur af heilbrigðisráðherra. Samningurinn tekur að hluta gildi 1. júlí nk. og að öllu leyti 1. september og er um að ræða fyrsta langtímasamninginn sem gildir um tannlækningar fyrir þennan hóp og tryggir greiðsluþátttöku samkvæmt samningnum og gjaldskrá til næstu fimm ára.
Samhliða vinnu við gerð þess samnings hefur ráðuneytið unnið að gerð nýrrar reglugerðar um greiðsluþátttöku vegna tannlækninga en hún mun taka gildi þann 1. júlí nk.
2. Hafa Sjúkratryggingar hafnað niðurgreiðslu aðgerða eða meðferða barna með skarð í vör eða tanngarði frá 1. janúar 2022?
Samkvæmt upplýsingum frá Sjúkratryggingum hefur stofnunin synjað einni umsókn frá 1. janúar 2022.
3. Helst réttur til niðurgreiðslu tannréttinga, aðgerða og meðferða vegna fyrrgreinds fæðingargalla eftir að 18 ára aldri er náð?
Eftir að barn með skarð í tannboga eða klofinn góm nær 18 ára aldri kann 100% greiðsluþátttaka í einstökum verkum að haldast til og með 22 ára aldurs sbr. 3. mgr. 5. gr. reglugerðar nr. 451/2013. Eftir það falla tannlækningarmeðferðir og tannréttingar fullorðinna einstaklinga með skarð í efri tannboga eða klofinn góm undir 95% greiðsluþátttöku skv. 16. gr. reglugerðarinnar, sbr. 1. tölul. 14. gr. Í nýrri reglugerð um greiðsluþátttöku vegna tannlæknakostnaðar sem tekur gildi 1. júlí nk. er heimild til greiðsluþátttöku í þessu samhengi til 30 ára aldurs í stað 22, líkt og reglugerð nr. 451/2013 mælir fyrir um.
