Ferill 841. máls. Aðrar útgáfur af skjalinu: PDF - Word Perfect.
154. löggjafarþing 2023–2024.
Þingskjal 1820 — 841. mál.
Svar
heilbrigðisráðherra við fyrirspurn frá Evu Sjöfn Helgadóttur um sjálfsofnæmissjúkdóma.
1. Hversu margir hafa greinst með sjálfsofnæmissjúkdóm á Íslandi sl. 20 ár? Svar óskast sundurliðað eftir aldri og kyni.
Undir sjálfsofnæmissjúkdóma fellur breiður flokkur sjúkdóma í mörgum líffærakerfum sem eiga það sameiginlegt að tengjast viðbrögðum ónæmiskerfisins, til að mynda MS, rauðir úlfar, sjögrens-heilkenni, rheumatoid arthritis (iktsýki), sóríasis o.fl. Á vegum heilbrigðisyfirvalda, þ.m.t. hjá embætti landlæknis, er ekki haldin sérstök skrá um sjálfsofnæmissjúkdóma. Því hefur heilbrigðisráðherra ekki upplýsingar um fjölda greininga þeirra.
2. Hefur greiningum á sjálfsofnæmissjúkdómum fjölgað eftir COVID-19-faraldurinn?
Ekki er haldin sérstök skrá yfir sjálfsofnæmissjúkdóma á vegum heilbrigðisyfirvalda hér á landi og er því ekki unnt að svara þessari spurningu með fullnægjandi hætti. Svo unnt væri að svara fyrirspurninni þyrfti að fara fram sjálfstæð rannsókn og ítarleg gagnaöflun.
3. Eru sjálfsofnæmissjúkdómar algengari hér á landi en annars staðar á Norðurlöndum? Ef svo er, hefur ráðherra skoðað hvaða hugsanlegu ástæður gætu legið þar að baki?
Þar sem á vegum heilbrigðisyfirvalda er ekki haldin sérstök skrá yfir sjálfsofnæmissjúkdóma er ekki unnt að svara þessari spurningu með fullnægjandi hætti.
