Ferill 825. máls. Aðrar útgáfur af skjalinu: PDF - Word Perfect.
154. löggjafarþing 2023–2024.
Þingskjal 1689 — 825. mál.
Svar
félags- og vinnumarkaðsráðherra við fyrirspurn frá Brynju Dan Gunnarsdóttur um fræðslu um hatursorðræðu og kynþáttahatur.
Fyrirspurnin hljóðar svo:
Hafa ráðuneytið og stofnanir þess boðið upp á fræðslu fyrir starfsfólk um hatursorðræðu og kynþáttahatur og ef svo er, hvernig hefur henni verið háttað? Ef svo er ekki, hyggst ráðherra sjá til þess að starfsmenn ráðuneytisins og stofnana þess fái slíka fræðslu?
Ráðuneytið hefur ekki boðið upp á fræðslu fyrir starfsfólk um hatursorðræðu og kynþáttahatur. Hins vegar telja ráðuneytið og ráðherra afar brýnt að koma slíkri fræðslu á og er hún hluti af fræðsluáætlun ráðuneytisins fyrir veturinn 2024–2025. Fyrirkomulag slíkrar fræðslu hefur ekki verið ákveðið né með hvaða hætti eða á hvers vegum slík fræðsla fer fram.
Hvað stofnanir ráðuneytisins varðar er allur gangur á því hvort og hvernig fræðsla um hatursorðræðu og kynþáttahatur hefur farið fram.
Tryggingastofnun fékk fulltrúa Mannflórunnar, fræðsluvettvangs um fjölmenningu í íslensku samfélagi, til að halda erindi árið 2023 þar sem rætt var um kynþáttafordóma. Ánægja var með framtakið og því er fyrirhugaður annar fyrirlestur frá sömu samtökum til að fjalla um birtingarmynd kynþáttafordóma, menningarfordóma og öráreitis gegn minnihlutahópum í samfélaginu.
Vinnumálastofnun stendur nú fyrir sex vikna fræðsluátaki fyrir starfsfólk sitt í fjölmenningarfræðslu. Hún fer fram með fyrirlestrum og umræðufundum í gegnum Teams og Learncove, fræðslukerfi stofnunarinnar, og með staðfundum. Fyrirlesarar koma bæði frá fjölmenningardeild Vinnumálastofnunar og utan úr samfélaginu. Áherslur fyrirlestranna hafa til að mynda legið á sviði fræðslu um áhrif og afleiðingar kynþátta- og menningarfordóma auk fræðslu um menningarlæsi. Vinnumálastofnun hyggst vinna áfram með fjölmenningaráherslur í fræðsludagskrá næsta vetrar.
Aðrar stofnanir ráðuneytisins svöruðu því til að fræðsla hefði ekki átt sér stað um hatursorðræðu og kynþáttahatur en flestar höfðu í hyggju að koma slíkri fræðslu á laggirnar fyrir sumarið eða næsta vetur.
Ráðherra mun halda áfram að hvetja stofnanir ráðuneytisins til að koma á fræðslu um hatursorðræðu og kynþáttahatur fyrir sitt starfsfólk enda er málefnið afar brýnt.
