Ferill 686. máls. Aðrar útgáfur af skjalinu: PDF - Word Perfect.

---

154. löggjafarþing 2023–2024.
Þingskjal 2029  —  686. mál.

Svar

menningar- og viðskiptaráðherra við fyrirspurn frá Óla Birni Kárasyni um Ríkisútvarpið og útvarpsgjald.

     1.      Hvernig hefur fjöldi greiðenda útvarpsgjalds þróast á árunum 2014–2024? Óskað er eftir upplýsingum miðað við 1. janúar ár hvert.
    Útvarpsgjald er innheimt af einstaklingum og lögaðilum í gegnum árlega álagningu í kjölfar skila á skattframtali. Þessar upplýsingar eru á forræði Skattsins og fjármála- og efnahagsráðuneytisins og býr því menningar- og viðskiptaráðuneytið ekki yfir umbeðnum upplýsingum.

     2.      Hvernig hefur fjöldi lögaðila sem greiða útvarpsgjald þróast á árunum 2014–2024? Óskað er eftir upplýsingum miðað við 1. janúar ár hvert.
    Útvarpsgjald er innheimt af lögaðilum í gegnum árlega álagningu í kjölfar skila á skattframtali. Þessar upplýsingar eru á forræði Skattsins og fjármála- og efnahagsráðuneytisins og býr því menningar- og viðskiptaráðuneytið ekki yfir umbeðnum upplýsingum.

     3.      Hver hefur fjárhæð útvarpsgjalds verið á hverju ári 2014–2024? Óskað er eftir upplýsingum á verðlagi hvers árs og á föstu verðlagi.
    Í eftirfarandi töflu er yfirlit hvernig fjárhæð útvarpsgjalds hefur þróast frá árinu 2014– 2024. Fjárhæð útvarpsgjalds hefur verið sú sama hjá lögaðilum og einstaklingum. Upplýsingar um fjárhæð útvarpsgjalds á verðlagi hvers árs er fengin af heimasíðu Skattsins.

Gjaldár	Útvarpsgjald á verðlagi hvers árs	Útvarpsgjald á verðlagi ársins 2024
2024	20.900	20.900
2023	20.200	21.545
2022	18.800	22.045
2021	18.300	22.679
2020	17.900	23.137
2019	17.500	23.004
2018	17.100	23.239
2017	16.800	23.373
2016	16.400	23.254
2015	17.800	25.782
2014	19.400	28.329

     4.      Hefur Ríkisútvarpið fengið önnur framlög frá ríkissjóði en af útvarpsgjaldi? Óskað er eftir upplýsingum á verðlagi hvers árs 2014–2024 og á föstu verðlagi. Jafnframt er óskað eftir rökstuðningi að baki framlögum.
    Ríkisútvarpið hefur frá árinu 2020 fengið 175 m.kr. framlag á ári til viðbótar við framlög samkvæmt áætlun fjárlaga um tekjur af útvarpsgjaldi. Kveðið hefur verið á um þetta tiltekna viðbótarframlag í þjónustusamningum við Ríkisútvarpið, annars vegar í samningi fyrir tímabilið 2020–2023 og hins vegar í samningi fyrir tímabilið 2024–2027. Viðbótarframlagið er sérstaklega tilgreint til eflingar á leiknu íslensku sjónvarpsefni. Auk þess er gert er ráð fyrir því í samningnum að hlutfall dagskrárefnis, sem keypt er af sjálfstæðum framleiðendum, eða sem Ríkisútvarpið er meðframleiðandi að, skuli á samningstímanum vera að meðaltali 35% af íslensku efni í sjónvarpi, mælt í klukkustundum og miðað við frumsýnt efni á kjörtíma í línulegri dagskrá.
    Ríkisútvarpið heyrði áður undir mennta- og menningarmálaráðuneytið og býr því menningar- og viðskiptaráðuneytið ekki yfir upplýsingum um önnur framlög frá ríkissjóði fyrir tíma þjónustusamnings frá árinu 2020.