Ferill 377. máls. Aðrar útgáfur af skjalinu: PDF - Word Perfect.
154. löggjafarþing 2023–2024.
Þingskjal 762 — 377. mál.
Svar
fjármála- og efnahagsráðherra við fyrirspurn frá Diljá Mist Einarsdóttur um starfsmenn skatt- og tollyfirvalda.
Fyrirspurnin hljóðar svo:
Hvernig hefur fjöldi stöðugilda hjá Skattinum þróast eftir að fjárveitingar vegna sérstaks átaks í skatteftirliti á árunum 2020–2022 runnu út?
Árið 2020 var hafið sérstakt átak í skatteftirliti á vegum skattyfirvalda með auknum fjárframlögum sem námu 200 millj. kr. árið 2020 og 100 millj. kr. til viðbótar hvert áranna 2021, 2022 og 2023, og þar með alls 500 millj. kr. árlega. Var um að ræða varanlega hækkun á fjárheimildum Skattsins en ekki tímabundna, vegna aukinnar áherslu á skatteftirlit. Á árinu 2022 voru 469 stöðugildi í sameinaðri stofnun skattyfirvalda, Skattinum. Hafði þeim þá fækkað um 22 stöðugildi frá árinu 2016 í kjölfar sameininga stofnana skatt- og tollyfirvalda, að frátöldum 21 starfsmanni sem síðan var ráðinn til skatteftirlitsins, sbr. svar við fyrirspurn á þskj. 2263 á 153. löggjafarþingi. Að þeim störfum meðtöldum hefur fækkað um eitt starf í starfsemi á þessu sviði frá árinu 2016.
