Ferill 248. máls. Aðrar útgáfur af skjalinu: PDF - Word Perfect.
154. löggjafarþing 2023–2024.
Þingskjal 1147 — 248. mál.
Svar
dómsmálaráðherra við fyrirspurn frá Arndísi Önnu Kristínardóttur Gunnarsdóttur um kostnað við flutning umsækjenda um alþjóðlega vernd úr landi.
1. Hversu margir umsækjendur um alþjóðlega vernd voru fluttir úr landi með aðstoð lögreglu á árinu 2022? Óskað er eftir sundurliðun eftir áfangastað og því hvort um var að ræða flutning samkvæmt Dyflinnarreglugerðinni, á grundvelli a-liðar 1. mgr. 36. gr. laga um útlendinga eða flutning í kjölfar efnismeðferðar umsóknar um vernd.
Árið 2022 fylgdi stoðdeild ríkislögreglustjóra 77 einstaklingum, sem fengið höfðu endanlega synjun á umsókn sinni um alþjóðlega vernd, úr landi samkvæmt ákvörðun Útlendingastofnunar um brottvísun eða frávísun.
| Flutningar eftir tegund mála | Fjöldi |
| Dyflinnarreglugerðin | 14 |
| Verndarmál (a-liður 1. mgr. 36. gr.) | 39 |
| Efnismeðferð | 24 |
| Alls | 77 |
Um tegund mála vísar „Dyflinnarreglugerðin“ til flutnings einstaklinga sem hafa hafið umsóknarferli um alþjóðlega vernd í ríki sem er aðili að Dyflinnarreglugerðinni, „verndarmál“ vísar til einstaklinga sem þegar hafa hlotið alþjóðlega vernd í viðtökuríki og „efnismeðferð“ vísar til þeirra mála þegar einstaklingar hafa hlotið efnislega meðferð á Íslandi.
| Áfangastaðir | Fjöldi |
| Grikkland | 33 |
| Albanía | 11 |
| Ítalía | 9 |
| Georgía | 8 |
| Svíþjóð | 3 |
| Ungverjaland | 3 |
| Fílabeinsströndin | 1 |
| Noregur | 1 |
| Dóminíska lýðveldið | 1 |
| Þýskaland | 1 |
| Spánn | 1 |
| Belgía | 1 |
| Bretland | 1 |
| Írland | 1 |
| Bandaríkin | 1 |
| Holland | 1 |
| Alls | 77 |
2. Hver var kostnaður íslenska ríkisins við fyrrgreinda flutninga? Auk framangreindrar sundurliðunar óskast svar sundurliðað eftir því hvers eðlis kostnaðurinn var, svo sem beinn kostnaður við flug, launakostnaður lögreglumanna o.þ.h.
| Kostnaður | 2022 |
| Heildarkostnaður stoðdeildar | 194.425.558 |
| Ferðakostnaður | 42.193.187 |
| Flugvélaleiga | 20.589.588 |
| Endurgreiðsla Frontex | -1.422.448 |
| Alls | 255.785.885 |
Líkt og nánar greinir í svari þáverandi ráðherra við sömu fyrirspurn vegna áranna 2019 til 2021, sbr. þskj. 391 í 127. máli á 152. löggjafarþingi, vísar „heildarkostnaður stoðdeildar“ annars vegar til almenns rekstrarkostnaðar stoðdeildar á árinu og hins vegar til launakostnaðar lögreglumanna hjá stoðdeild samkvæmt gildandi kjarasamningum og samningi Útlendingastofnunar og ríkislögreglustjóra um verkefni stoðdeildar. Alls störfuðu um 11 starfsmenn í 100% starfi í stoðdeild árið 2022. Launakostnaður starfsmanna er ekki aðgreindur eftir verkefnum en stoðdeildin sinnir auk flutninga útlendinga, sem fengið hafa endanlega synjun á umsókn sinni um alþjóðlega vernd, flutningum í fylgd vegna framsals sakamanna, flutningi fanga og framkvæmd frávísana samkvæmt ákvörðunum teknum af lögreglu.
„Ferðakostnaður“ vísar til fargjalda með áætlunarflugi frá Íslandi, dagpeninga lögreglumanna við framkvæmd flutninga í fylgd og kostnaðar vegna aðstoðar annarra sérfræðinga eða eftirlitsaðila sem eftir atvikum fylgja viðkomandi alla ferðina frá Íslandi til viðtökuríkis. Sem dæmi um slíka aðila eru túlkar, sjálfstæðir eftirlitsaðilar, fulltrúar heilbrigðisyfirvalda, svo sem læknir eða hjúkrunarfræðingur, og fulltrúar félagsmálayfirvalda, svo sem barnaverndarfulltrúi. Til viðbótar vísar ferðakostnaður til útgjalda vegna vottorða frá ýmsum stofnunum, svo sem Þjóðskrá Íslands og heilbrigðisyfirvöldum.
„Flugvélaleiga“ vísar til þess þegar flugvélar hafa verið leigðar í stað þess að fara í áætlunarflug.
„Endurgreiðsla Frontex“ vísar til endurgreiðslu frá Landamæra- og strandgæslustofnun Evrópu.
3. Hver var meðalkostnaður ríkisins við flutning einstaklings úr landi gegn vilja viðkomandi á árinu 2022?
Eins og að framan greinir framkvæmdi stoðdeild ríkislögreglustjóra flutning á 77 útlendingum, sem fengið höfðu endanlega synjun á umsókn sinni um alþjóðlega vernd, í fylgd úr landi til fjölmargra áfangastaða árið 2022. Kostnaður vegna ferða er mjög breytilegur og hafa fjölmargir þættir áhrif. Þannig getur til dæmis fluggjald verið misjafnt eftir áfangastað, ferðaleið og tegund flugs, þ.e. hvort um áætlunarflug sé að ræða eða leigu á flugvél. Misjafnt er hversu margir lögreglumenn eru í hverri ferð og fer það eftir fjölda þeirra útlendinga sem fylgt er úr landi hverju sinni og hættumati sem framkvæmt er fyrir hverja ferð. Eftir atvikum koma aðrir aðilar að flutningi, svo sem túlkur, læknir eða aðrir sérfræðingar eða eftirlitsaðilar. Þá eru fjárhæðir dagpeninga misjafnar eftir áfangastað og lengd ferðar. Það ber að athuga með vísan til framangreinds að kostnaður vegna flutnings getur verið afar misjafn þrátt fyrir að um flutning til sama áfangastaðar sé að ræða.
Ekki liggja fyrir upplýsingar um sundurliðaðan kostnað vegna hvers og eins flutnings enda er stærstur hluti kostnaðar fólginn í föstum launakostnaði starfsmanna stoðdeildar sem eins og áður greinir vinnur að mörgum verkefnum á hverjum tíma. Hins vegar má draga ályktun um kostnað hvers flutnings með meðaltali þeirra upplýsinga sem fram koma í töflu að framan. Það ber þó að ítreka að vegna mismunandi aðstæðna getur kostnaður vegna hvers og eins flutnings verið afar misjafn, auk þess sem stoðdeild sinnir mörgum öðrum verkefnum. Auk þeirra 77 útlendinga, sem fengið höfðu endanlega synjun á umsókn sinni um alþjóðlega vernd og voru fluttir af stoðdeild árið 2022, framkvæmdi stoðdeild einnig 59 aðra flutninga árið 2022 sem voru ekki fyrrverandi umsækjendur um alþjóðlega vernd. Þetta getur t.d. átt við um brottvísun fanga, brottvísun útlendinga í ólögmætri dvöl, framsal sakamanna, fangaflutninga o.fl.
Tími.
Undirstofnun 1,5 klst.
Sérfræðingur 3 klst.
Skrifstofustjóri 15 mín.
