Ferill 1097. máls. Aðrar útgáfur af skjalinu: PDF - Word Perfect.
154. löggjafarþing 2023–2024.
Þingskjal 2189 — 1097. mál.
Svar
heilbrigðisráðherra við fyrirspurn frá Þórunni Sveinbjarnardóttur um brjóstaskimanir.
1. Hver var árlegur fjöldi skimana fyrir brjóstakrabbameini á tímabilinu 2013–2023? Óskað er sundurliðunar eftir ári og aldri við skimun.
Í eftirfarandi töflu kemur fram fjöldi skimana fyrir brjóstakrabbameini, sundurliðað eftir árum og aldursflokkum:
Hér er efni sem sést aðeins í pdf-skjalinu.
Fjöldatölur fyrir hvert ár endurspegla ekki þátttökuna það árið nema að hluta til. Þátttökuhlutfall í brjóstaskimun gefur réttari mynd af því hver þátttakan í skimuninni er.
Þátttökuhlutfall er vel skilgreindur alþjóðlegur gæðavísir í krabbameinsskimun og er hlutfall kvenna sem mæta í skimun af þeim fjölda kvenna sem fær boð í skimun á skilgreindu tímabili. Þátttökuhlutfall er skilgreint út frá mætingu kvenna á skimunarskrá í árslok hvert ár, konur á aldrinum 40–69 ára sem hafa mætt síðastliðin tvö ár og konur á aldrinum 70–74 ára síðastliðin þrjú ár. Frá árinu 2021 hafa konur á aldrinum 70–74 ára fengið boð í skimun til viðbótar við konur á aldrinum 40–69 ára. Eftirfarandi tafla sýnir þátttökuhlutfall í skimun fyrir brjóstakrabbameini frá árinu 2013:
| Ár | Hlutfall |
| 2013 | 59% |
| 2014 | 59% |
| 2015 | 58% |
| 2016 | 55% |
| 2017 | 57% |
| 2018 | 57% |
| 2019 | 61% |
| 2020 | 62% |
| 2021 | 54% |
| 2022 | 52% |
| 2023 | 56% |
2. Hver var kostnaður ríkisins við brjóstaskimanir á sama tímabili, sundurliðað eftir ári?
Eftirfarandi eru kostnaðartölur frá Krabbameinsfélaginu og Landspítala vegna brjóstaskimana fyrir tímabilið 2013–2023. Við þennan kostnað bætist kostnaður vegna klínískra brjóstaskoðana og endurinnkallana þegar eitthvað finnst í skimun sem þarf að skoða betur. Sá kostnaður er ekki talinn í þessum tölum.
Ábyrgð á sérskoðunum á brjóstum fluttist til Landspítala frá Krabbameinsfélaginu árið 2017. Gjöld og tekjur 2017 til 2020 í töflunni tengjast samningi við Krabbameinsfélagið um klínískar sérskoðanir á brjóstum. Landspítali greiddi fyrir aðstöðu og móttöku í húsnæði Krabbameinsfélagsins og fékk á móti tekjur vegna hlutar sjúklings. Í upphafi árs 2021 færðist ábyrgð á skimun við brjóstakrabbameini einnig til Landspítala og á sama tíma fluttist starfsemin, bæði skimun og sérskoðanir, á göngudeild Landspítala Eiríksgötu 5.
Hér er efni sem sést aðeins í pdf-skjalinu.
