Ferill 1066. máls. Aðrar útgáfur af skjalinu: PDF - Word Perfect.
154. löggjafarþing 2023–2024.
Þingskjal 1710 — 1066. mál.
Svar
matvælaráðherra við fyrirspurn frá Indriða Inga Stefánssyni um ávinning sjálfvirknivæðingar og gervigreindar.
Hefur farið fram vinna í ráðuneytinu til að tryggja að eðlilegur hluti þess ávinnings sem verður af fyrirséðu hagræði vegna gervigreindar annars vegar og sjálfvirknivæðingar hins vegar skili sér til almennings? Ef svo er ekki, stendur það til?
Fjórða iðnbyltingin, sem er knúin af tækninýjungum eins og sjálfvirknivæðingu og gervigreind, hefur haft mikil áhrif á vinnumarkaðinn nú þegar og eiga áhrifin eftir að aukast verulega á næstu árum. Sum störf hverfa vegna sjálfvirknivæðingar en á móti eru sköpuð ný og spennandi störf. Menntun í samræmi við þarfir vinnumarkaðarins er mikilvægari en áður, sérstaklega fyrir ungt fólk sem er að byrja á vinnumarkaðnum en einnig í formi sí- og endurmenntunar. Menntakerfið, í samráði við atvinnulífið, leikur lykilhlutverk í að mæta tæknibreytingum. Nauðsynlegt er að auka hlutfall STEM-menntaðra í landinu með sameiginlegu átaki til að geta mætt væntanlegum tæknibreytingum þannig að ávinningur þeirra skili sér til almennings.
Stjórnvöld gáfu út stefnu um stafræna þjónustu hins opinbera árið 2021 með það að markmiði að auka samkeppnishæfni, bæta opinbera þjónustu, auka öryggi innviða og skapa nútímalegra starfsumhverfi. Meginþema stefnunnar felst í að einfalda líf fólks með bættri stafrænni þjónustu í þágu almennings og atvinnulífs. Í matvælaráðuneytinu og undirstofnunum þess er lögð rík áhersla á umbreytingu með stafrænni stjórnsýslu í þeim tilgangi að spara tíma, auka hagræði og gagnsæi, sem og að stuðla að jákvæðari umhverfisáhrifum og auka aðgengi almennings að opinberum upplýsingum. Þessi stafræna umbreyting gefur sóknarfæri í endurskipulagningu opinberra stofnana með það að markmiði að samþætta starfsemi og þjónustu hins opinbera til að lækka ríkisútgjöld og auka gæði og skilvirkni opinberrar þjónustu.
Í ráðuneytinu er stafræn þróun forgangsverkefni með fjölda tækifæra, hvort sem er á sviði rannsókna, vöktunar, eftirlits eða stjórnsýslu. Ráðuneytið hefur forgangsraðað fjármunum í stafræna þjónustu á liðnum árum þar sem stöðugildi hafa sparast vegna stafrænnar þróunar. Ráðuneytið hefur sett fram aðgerðaáætlun um stafræna þróun á málefnasviðum ráðuneytisins og er jafnframt með sérfræðing í fullu starfi við framkvæmd og innleiðingu aðgerðaáætlunarinnar.
