Ferill 1062. máls. Aðrar útgáfur af skjalinu: PDF - Word Perfect.
154. löggjafarþing 2023–2024.
Þingskjal 2147 — 1062. mál.
Svar
mennta- og barnamálaráðherra við fyrirspurn frá Indriða Inga Stefánssyni um ávinning sjálfvirknivæðingar og gervigreindar.
Fyrirspurnin hljóðar svo:
Hefur farið fram vinna í ráðuneytinu til að tryggja að eðlilegur hluti þess ávinnings sem verður af fyrirséðu hagræði vegna gervigreindar annars vegar og sjálfvirknivæðingar hins vegar skili sér til almennings? Ef svo er ekki, stendur það til?
Í mennta- og barnamálaráðuneyti hefur ekki farið fram formleg greining á áhrifum og væntum ávinningi til handa almenningi vegna nýtingar gervigreindar og sjálfvirknivæðingar. Í starfsemi ráðuneytisins og undirstofnana þess er tekið mið af stefnu Íslands um gervigreind sem forsætisráðuneytið gaf út árið 2021 og horft til verkefna sem styðja við velsældaráherslu ríkisstjórnarinnar um bætt samskipti við almenning sem miðar að því að gera þjónustu ráðuneytisins og stofnana þess skýrari, einfaldari og skilvirkari. Þáttur í því lýtur að upplýsingagjöf og aðgengi fyrir almenning, m.a. fyrir tilstilli gervigreindar vegna þátta sem falla undir málefnasvið ráðuneytisins.
Ráðuneytið hefur verið í samstarfi við Stafrænt Ísland sem hefur það hlutverk að skoða mögulega hagnýtingu gervigreindar hjá hinu opinbera. Ráðuneytið hefur miklar væntingar til þeirrar vinnu og þá hefur Stjórnarráðið nýlega gefið út leiðbeiningar fyrir opinbera aðila sem nýta eða hyggjast nýta gervigreind í starfsemi sinni til að bæta opinbera þjónustu og skilvirkni. Ljóst er að fjölmörg tækifæri eru til hagnýtingar gervigreindar á öllum málefnasviðum ráðuneytisins með það að markmiði að auka skilvirkni í þjónustu og hvers konar upplýsingagjöf, t.d. með samskiptum og svörun við fyrirspurnum frá almenningi sem byggjast á fyrirliggjandi gagnasafni ráðuneytisins, einnig hjá undirstofnunum ráðuneytisins sem veita margs konar þjónustu, svo sem Miðstöð menntunar og skólaþjónustu, Barna- og fjölskyldustofu og Ráðgjafar- og greiningarstöð ríkisins.
