Ferill 1061. máls. Aðrar útgáfur af skjalinu: PDF - Word Perfect.
154. löggjafarþing 2023–2024.
Þingskjal 1765 — 1061. mál.
Svar
menningar- og viðskiptaráðherra við fyrirspurn frá Indriða Inga Stefánssyni um ávinning sjálfvirknivæðingar og gervigreindar.
Fyrirspurnin hljóðar svo:
Hefur farið fram vinna í ráðuneytinu til að tryggja að eðlilegur hluti þess ávinnings sem verður af fyrirséðu hagræði vegna gervigreindar annars vegar og sjálfvirknivæðingar hins vegar skili sér til almennings? Ef svo er ekki, stendur það til?
Sögulega hefur tækniþróun búið til mikinn ávinning fyrir skilvirkni í flestum atvinnugreinum. Stafrænt Ísland og Umbra, stofnanir fjármála- og efnahagsráðuneytis, hafa forystu í málefnum tengdum gervigreind og sjálfvirknivæðingu í Stjórnarráðinu. Engu að síður hefur þó nokkur vinna átt sér stað í menningar- og viðskiptaráðuneyti, í samstarfi við önnur ráðuneyti, í tengslum við gervigreind og sjálfvirknivæðingu. Nefna má að reglur um notkun gervigreindar eru nú í vinnslu í ráðuneytinu. Þá hefur íslenska UNESCO-nefndin, í samvinnu við menningar- og viðskiptaráðuneyti og háskóla-, iðnaðar- og nýsköpunarráðuneyti, nýverið gefið út UNESCO-tilmælin um siðferði gervigreindar: Mótun samfélaga okkar til framtíðar.
Einnig má nefna fjölmargar tæknilausnir á sviði máltækni sem styðjast við gervigreind og sjálfvirknivæðingu sem hafa verið kynntar undanfarin misseri og ár. Lagt er til í nýrri máltækniáætlun fyrir árin 2024–2026, sem menningar- og viðskiptaráðuneytið lét vinna, að ráðuneytið leiti samstarfs við háskóla-, iðnaðar- og nýsköpunarráðuneytið um að kanna fýsileika þess að koma á fót gervigreindar- og máltæknimiðstöð og auki samvinnu um málefni máltækni og gervigreindar sem eru samofin í dag. Þá er lagt til að ráðuneytin vinni sameiginlega langtímastefnu á báðum málefnasviðum. Ráðuneytin hafa þegar hafið samtal um þessar tillögur.
Einn helsti áhersluþáttur máltækniáætlunarinnar snýr að því hvernig tryggja megi að ný tækni, innviðir í máltækni og gervigreind sem þróaðir hafa verið hér á landi á síðustu árum, nýtist almenningi sem best. Hagnýting tækninnar er leiðarstef áætlunarinnar og þar má finna tillögur um t.d. nýja hagnýtingarstyrki í máltækni fyrir fyrirtæki, aukið fjármagn í kynningarstarf fyrir fyrirtæki og almenning um hvernig nýta megi þessa nýju tækni, auk fjárfestingar í þróun tæknilegra innviða sem nýta má í hagnýtingu.
Ávinningur af hagræði vegna gervigreindar annars vegar og sjálfvirknivæðingar hins vegar hefur ekki verið mældur en leiðir til þess eru til skoðunar.
