Ferill 1045. máls. Aðrar útgáfur af skjalinu: PDF - Word Perfect.
154. löggjafarþing 2023–2024.
Þingskjal 2188 — 1045. mál.
Svar
heilbrigðisráðherra við fyrirspurn frá Diljá Mist Einarsdóttur um brjóstaminnkunaraðgerðir.
1. Hvað líður samningaviðræðum Læknafélags Íslands og Sjúkratrygginga Íslands um greiðsluþátttöku í brjóstaminnkunaraðgerðum fyrir þá skjólstæðinga sem hafa sjálfir þurft að greiða fyrir þær?
Sjúkratryggingar Íslands og Læknafélag Reykjavíkur undirrituðu samning til fimm ára í september 2023. Samningurinn tryggir greiðsluþátttöku almennings fyrir þær aðgerðir sem falla undir samninginn. Samkvæmt upplýsingum frá Sjúkratryggingum Íslands hefur staðið yfir vinna með samningsaðilum frá síðastliðnu hausti við að fara yfir gjaldskrár sérgreinalækna. Þeirri vinnu er ekki lokið en m.a. er gjaldskrá skurðlækna til skoðunar og þar á meðal aðgerðir til brjóstaminnkunar. Lýtalæknar hafa gerst aðilar að samningnum og fá því einstaklingar sem fá þjónustu þeirra lækna greiðsluþátttöku á þeim læknisverkum sem samningurinn tekur til.
2. Hversu langur biðlisti er eftir brjóstaminnkunaraðgerðum á opinberum sjúkrastofnunum?
Í janúar biðu 138 konur eftir brjóstaminnkun á Landspítala og ein kona á Sjúkrahúsinu á Akureyri samkvæmt mælaborði um bið eftir heilbrigðisþjónustu sem finna má á vef embættis landlæknis.
Landspítali hefur unnið að sérstöku átaki til að stytta bið eftir brjóstaminnkunaraðgerð með því að leigja afnot af skurðstofu utan spítalans. Það verkefni gengur vel og er gert ráð fyrir að biðtími eftir umræddum aðgerðum verði innan viðmiðunarmarka við lok árs 2024.
3. Hvaða kröfur eru gerðar um líkamsþyngd sjúklinga í brjóstaminnkunaraðgerðum? Eru þær kröfur sambærilegar þeim sem gerðar eru annars staðar á Norðurlöndum?
Gerð er krafa um BMI-stuðul innan við 27 og er sú þyngdarkrafa í samræmi við opinber sjúkrahús á Norðurlöndum.
