Ferill 1015. máls. Aðrar útgáfur af skjalinu: PDF - Word Perfect.
154. löggjafarþing 2023–2024.
Þingskjal 1687 — 1015. mál.
Svar
fjármála- og efnahagsráðherra við fyrirspurn frá Diljá Mist Einarsdóttur um breytingar á reglum um skattmat.
1. Á grundvelli hvaða lagagreinar byggjast breytingar á skattmati hvað varðar jólagjafir fyrirtækja til starfsmanna í formi bankakorta?
Árlegar reglur um skattmat vegna tekna manna og breytingar á því byggjast á 118. gr. laga um tekjuskatt, nr. 90/2003, sbr. og A-lið 1. mgr. 30. gr. þeirra laga og ákvæði í c-lið 6. gr. reglugerðar um frádrátt frá tekjum af atvinnurekstri eða sjálfstæðri starfsemi, nr. 1300/2021. Í skattmati fyrir tekjuárið 2023, nr. 1490/2022, var bætt inn setningu til að árétta og skýra það betur að gjafir og kaupaukar í peningum, hvernig sem þeir eru afhentir, eru og hafa ætíð talist til skattskyldra tekna starfsmanna.
2. Telst það alltaf til tekna að gefa starfsfólki bankakort í jólagjöf, óháð fjárhæð þess og því hvort endurgjald fáist fyrir vinnu?
Samkvæmt 4. tölul. A-liðar 7. gr. laga um tekjuskatt er meginreglan sú að gjafir skuli telja til tekna, hvort heldur um er að ræða beinar gjafir í peningum eða öðrum verðmætum.
Í sömu grein kemur fram undanþága frá þeirri meginreglu þess efnis að tækifærisgjafir eru undanskildar skattskyldu svo lengi sem verðmæti þeirra er ekki hærra en almennt gengur og gerist um slíkar gjafir. Umræddar tækifærisgjafir eru sem dæmi afmælisgjafir, jólagjafir, skírnargjafir, brúðkaupsgjafir og aðrar slíkar gjafir sem standa öllum starfsmönnum jafnt til boða, enda sé heildarfjárhæð ekki umfram tiltekna fjárhæð sem á tekjuárinu 2024 er 175.000 kr.
Gjafir og kaupaukar í peningum, hvernig sem þeir eru afhentir, teljast ekki til slíkra tækifærisgjafa. Þeir teljast ætíð til skattskyldra tekna starfsmanna og skiptir þá hvorki máli í hvaða mynd þeir eru veittir, s.s. beinhörðum peningum, innleggi á bankareikninga eða afhendingu á bankakorti né fjárhæð þeirra.
Reglur um skattmat vegna tekna manna taka til hvers þess sem nýtur hlunninda eða er aðnjótandi gæða sem telja ber til tekna óháð starfssambandi milli þess er lætur hlunnindi eða gæði af hendi og þess sem þeirra nýtur. Skiptir ekki máli hvort það sem meta skal til tekna er endurgjald fyrir vinnu eða er tilkomið með öðrum hætti.
3. Hvers vegna eru bankakort skattlögð en ekki önnur gjafakort? Hver er munurinn á gjafakortum í banka annars vegar og í verslanir, verslunarmiðstöðvar eða fyrir tiltekna þjónustu hins vegar?
Með vísan til svars við 2. tölul. fyrirspurnarinnar er meginregla laga um tekjuskatt sú að gjafir skuli telja til tekna, hvort heldur um er að ræða beinar gjafir í peningum eða öðrum verðmætum. Einungis er heimilt að telja ekki til skattskyldra tekna tækifærisgjafir, í öðru en peningum, sem eru innan ákveðinna fjárhæðarmarka. Gjafir og kaupaukar umfram fjárhæðarmörk skattmatsreglna og gjafir í peningum óháð fjárhæð þeirra, teljast starfsmanni til tekna, hvernig sem fyrirkomulagi á greiðslum launagreiðanda er háttað. Gjafabréf til úttektar í einstökum verslunum, leikhúsum, tónleikastöðum eða öðru sambærilegu hafa verið talin falla undir þá undanþágu frá meginreglu laga um tekjuskatt að vera tækifærisgjöf til starfsmanna sem innan ákveðinna fjárhæðarmarka teljast ekki til skattskyldra tekna.
