Ferill 951. máls. Aðrar útgáfur af skjalinu: PDF - Word Perfect.
153. löggjafarþing 2022–2023.
Þingskjal 2162 — 951. mál.
Svar
félags- og vinnumarkaðsráðherra við fyrirspurn frá Guðmundi Inga Kristinssyni um uppbætur á lífeyri.
1. Hve margar umsóknir hafa borist um uppbætur á lífeyri skv. 1. mgr. 9. gr. laga um félagslega aðstoð, nr. 99/2007, á ári hverju, undanfarin fjögur ár?
Samkvæmt þeim upplýsingum sem ráðuneytið hefur aflað frá Tryggingastofnun ríkisins var fjöldi umsókna um uppbætur á lífeyri skv. 1. mgr. 9. gr. laga um félagslega aðstoð síðustu fjögur ár eftirfarandi:
| Ár móttekin | 2019 | 2020 | 2021 | 2022 |
| Fjöldi umsókna | 2.837 | 4.043 | 4.680 | 4.197 |
2. Hversu oft hefur verið fallist á umsóknir um uppbætur á lífeyri undanfarin fjögur ár og hvernig skiptast ákvarðanir um uppbætur eftir þeim tilefnum sem tilgreind eru í 1.–5. tölul. 2. mgr. 9. gr. reglugerðar nr. 1200/2018, um heimilisuppbót og uppbætur á lífeyri?
Að beiðni ráðuneytisins hefur Tryggingastofnun tekið saman eftirfarandi upplýsingar um samþykktar umsóknir um uppbætur á lífeyri, skipt niður eftir þeim tilefnum sem tilgreind eru í 1.–5. tölul. 2. mgr. 9. gr. reglugerðar um heimilisuppbót og uppbætur á lífeyri, nr. 1200/2018.
| Fjöldi samþykktra umsókna undanfarin fjögur ár sundurliðað eftir tilefnum | 2019 | 2020 | 2021 | 2022 |
| 1. tölul. Umönnunarkostnaður, sem heimilishjálp eða aðrir opinberir aðilar greiða ekki. | 1 | 1 | ||
| 2. tölul. Sjúkra- eða lyfjakostnaður og kostnaður vegna kaupa á heyrnartæki, sem sjúkratryggingar greiða ekki. | 1.539 | 2.184 | 2.820 | 2.587 |
| 3. tölul. Húsaleigukostnaður, sem fellur utan húsnæðisbóta og sérstaks húsnæðisstuðnings. | 27 | 29 | 24 | 31 |
| 4. tölul. Dvalarkostnaður á sambýlum og áfangastöðum, sem fengið hafa starfsleyfi frá ráðuneyti eða reka sambærilega starfsemi, ef ekki eru greiddar húsnæðisbætur. | 224 | 263 | 282 | 287 |
| 5. tölul. Rafmagnskostnaður vegna súrefnissíunotkunar. | 8 | 7 | 8 | 8 |
| Samtals | 1.799 | 2.483 | 3.135 | 2.913 |
3. Hvernig meta stjórnvöld það hvort einstaklingur geti framfleytt sér án uppbótar á lífeyri?
Í 9. gr. laga um félagslega aðstoð, nr. 99/2007, er kveðið á um uppbætur á lífeyri. Við mat á þörf skv. 1. mgr. 9. gr. skal taka tillit til eigna og tekna lífeyrisþega og kostnaðar. Í 5. mgr. 9. gr. segir að Tryggingastofnun ríkisins meti þörf samkvæmt ákvæðinu. Jafnframt er í 6. mgr. 9. gr. kveðið á um heimild ráðherra til setja reglugerð um nánari framkvæmd ákvæðisins. Núgildandi reglugerð um heimilisuppbót og uppbætur á lífeyri er nr. 1200/2018, með síðari breytingum. Í III. kafla reglugerðarinnar eru ákvæði um uppbót á lífeyri skv. 1. mgr. 9. gr. laganna og eru þar m.a. tilgreind þau skilyrði sem þurfa að vera fyrir hendi svo heimilt sé að greiða slíka uppbót, sem og hámark uppbóta og tekju- og eignamörk. Uppbætur eru ekki greiddar lífeyrisþega sem á eignir í peningum eða verðbréfum yfir 4.000.000 kr. eða hefur heildartekjur yfir 3.562.652 á ári, árið 2023, sbr. reglugerð um heimilisuppbót og uppbætur á lífeyri, nr. 1200/2018, með síðari breytingum.
4. Hver er meðalfjárhæð uppbóta skv. 1. mgr. 9. gr. laga um félagslega aðstoð, á ári hverju, undanfarin fjögur ár? Svar óskast sundurliðað eftir þeim tilefnum sem tilgreind eru í 1.–5. tölul. 2. mgr. 9. gr. reglugerðar nr. 1200/2018.
Samkvæmt þeim upplýsingum sem ráðuneytið hefur aflað frá Tryggingastofnun ríkisins er meðalfjárhæð uppbóta skv. 1. mgr. 9. gr. laga um félagslega aðstoð, nr. 99/2007, sundurliðuð eftir árum og þeim tilefnum sem tilgreind eru í 1.–5. tölul. 2. mgr. 9. gr. reglugerðar um heimilisuppbót og uppbætur á lífeyri eftirfarandi:
| Meðalfjárhæð uppbóta undanfarin fjögur ár sundurliðað eftir tilefnum |
2019 | 2020 | 2021 | 2022 |
| 1. tölul. Umönnunarkostnaður, sem heimilishjálp eða aðrir opinberir aðilar greiða ekki. | 40.234 | 136.425 | 248.522 | 274.677 |
| 2. tölul. Sjúkra- eða lyfjakostnaður og kostnaður vegna kaupa á heyrnartæki, sem sjúkratryggingar greiða ekki. | 34.382 | 35.805 | 39.838 | 42.671 |
| 3. tölul. Húsaleigukostnaður, sem fellur utan húsnæðisbóta og sérstaks húsnæðisstuðnings. | 180.925 | 179.590 | 131.256 | 155.011 |
| 4. tölul. Dvalarkostnaður á sambýlum og áfangastöðum, sem fengið hafa starfsleyfi frá ráðuneyti eða reka sambærilega starfsemi, ef ekki eru greiddar húsnæðisbætur. | 221.729 | 209.455 | 238.852 | 236.012 |
| 5. tölul. Rafmagnskostnaður vegna súrefnissíunotkunar. | 6.498 | 8.718 | 9.631 | 12.379 |
5. Hversu oft hafa stjórnvöld hafnað lífeyrisþegum um uppbætur á lífeyri vegna sjúkra- eða lyfjakostnaðar á undanförnum fjórum árum?
Tryggingastofnun ríkisins hefur að beiðni ráðuneytisins tekið saman upplýsingar um fjölda synjana um uppbætur á lífeyri vegna sjúkra- eða lyfjakostnaðar undanfarin fjögur ár, sem eru eftirfarandi:
| Fjöldi synjaðra umsókna um uppbætur vegna sjúkra- eða lyfjakostnaðar undanfarin fjögur ár | 2019 | 2020 | 2021 | 2022 |
| Sjúkra- eða lyfjakostnaður og kostnaður vegna kaupa á heyrnartæki, sem sjúkratryggingar greiða ekki (sbr. 2. tölul. 1. mgr. 9. gr. reglugerðar nr. 1200/2018) | 840 | 1.312 | 1.255 | 989 |
