Ferill 926. máls. Aðrar útgáfur af skjalinu: PDF - Word Perfect.
153. löggjafarþing 2022–2023.
Þingskjal 1608 — 926. mál.
Svar
forsætisráðherra við fyrirspurn frá Hildi Sverrisdóttur um sjóði á vegum ráðuneytisins og stofnana þess.
1. Hvaða sjóði starfrækja ráðuneytið og stofnanir þess?
Forsætisráðuneytið starfrækir þrjá sjóði: 1) Jafnréttissjóð Íslands, 2) Framkvæmdasjóð hinsegin málefna og 3) Framkvæmdasjóð jafnréttismála. Enginn sjóður er starfræktur á meðal þeirra stofnana sem heyra stjórnarfarslega undir ráðuneytið.
2. Hver fer með umsýslu hvers sjóðs?
Ráðherra skipar þriggja manna stjórn Jafnréttissjóðs Íslands og jafn marga til vara sem annast mat á umsóknum um styrki. Umsýsla sjóðsins er í höndum Rannsóknamiðstöðvar Íslands (Rannís) í umboði forsætisráðherra. Umsýsla Framkvæmdasjóðs hinsegin málefna og Framkvæmdasjóðs jafnréttismála er hjá skrifstofu jafnréttis- og mannréttindamála í forsætisráðuneytinu.
3. Hvaða lög og reglur gilda um útdeilingu fjármuna úr hverjum sjóði?
Jafnréttissjóður Íslands var stofnaður árið 2015 á grunni þingsályktunar nr. 13/144, í tilefni af 100 ára kosningarréttarafmæli íslenskra kvenna. Um úthlutun úr sjóðnum gilda reglur nr. 144/2021, um úthlutun styrkja úr Jafnréttissjóði Íslands, sem birtar eru á vef Stjórnartíðinda og á vef sjóðsins. Þar má jafnframt finna starfsreglur stjórnar, upplýsingar um fagráð, handbók sjóðsins og fleiri gagnlegar upplýsingar.
Framkvæmdasjóður hinsegin málefna byggist á aðgerðaáætlun í málefnum hinsegin fólks fyrir árin 2022–2025 sem samþykkt var á Alþingi með þingsályktun nr. 21/152 í júní 2022. Reglur um úthlutun úr Framkvæmdasjóði hinsegin málefna, nr. 977/2022, eru birtar á vef Stjórnartíðinda.
Framkvæmdasjóður jafnréttismála var settur á laggirnar á grundvelli framkvæmdaáætlunar í jafnréttismálum 2020–2023 sem samþykkt var á Alþingi með þingsályktun nr. 16/150 í lok árs 2019. Reglur um úthlutun úr Framkvæmdasjóði jafnréttismála, nr. 50/2020, eru birtar á vef Stjórnartíðinda.
4. Hvað kostaði að starfrækja hvern sjóð árið 2022?
Forsætisráðuneytið hefur gert samning við Rannís um vörslu og umsýslu Jafnréttissjóðs Íslands til eins árs í senn. Ekki var úthlutað úr sjóðnum árið 2022 og því féll enginn kostnaður til vegna sjóðsins á árinu.
Umsýsla Framkvæmdasjóðs hinsegin málefna og Framkvæmdasjóðs jafnréttismála er sem fyrr segir í höndum starfsmanna forsætisráðuneytisins, án þess að kostnaður við umsýsluna hafi verið reiknaður sérstaklega út.
5. Hver var kostnaðurinn við að starfrækja hvern sjóð í hlutfalli við þá fjármuni sem var úthlutað úr sjóðnum árið 2022?
Sjá svar við lið 4.
