Ferill 877. máls. Aðrar útgáfur af skjalinu: PDF - Word Perfect.
153. löggjafarþing 2022–2023.
Þingskjal 1566 — 877. mál.
Svar
matvælaráðherra við fyrirspurn frá Sigurjóni Þórðarsyni um úthlutun byggðakvóta.
Úthlutun byggðakvóta er sérstök úthlutun af þeim 5,3% sem dregin eru frá heildaraflamarki hvers fiskveiðiárs skv. 3. mgr. 8. gr. laga nr. 116/2006, um stjórn fiskveiða, sbr. 5. mgr. sömu greinar. Hér er því um úthlutun að ræða sem er utan aflahlutdeildarkerfisins. Þar sem verið er að úthluta aflamarki til eins árs í senn á grundvelli ákvæða 10. gr. laganna þá er ekki um úthlutun á hlutdeild að ræða. Á grundvelli ákvæða 3. mgr. 10. gr. hefur ráðherra sett reglugerð nr. 1018/2022 um úthlutun byggðakvóta til byggðarlaga á fiskveiðiárinu 2022/2023. Jafnframt hefur ráðherra sett reglugerð nr. 1370/2022 um úthlutun byggðakvóta til fiskiskipa á fiskveiðiárinu 2022/2023. Í framangreindum reglugerðum koma fram þau skilyrði sem uppfylla þarf varðandi úthlutun og afhendingu aflamarks til einstakra fiskiskipa. Ef ekki næst að afhenda allt aflamark sem til ráðstöfunar á viðkomandi fiskveiðiári þá kemur það til endurúthlutunar á næsta fiskveiðiári þar á eftir. Að framansögðu eiga því ákvæði 13. gr. ekki við þegar um úthlutun byggðakvóta er að ræða.
2. Ef svarið við 1. tölul. er jákvætt, hvernig er þá brugðist við ef í ljós kemur að viðtakandi byggðakvóta býr yfir meiri aflahlutdeild en sem nemur hámarksaflahlutdeild?
Vísað er til svars við 1. tölul. fyrirspurnarinnar.
3. Ef svarið við 1. tölul. er neikvætt, hvers vegna er þess þá ekki gætt?
Vísað er til svars við 1. tölul. fyrirspurnarinnar.
4. Taka stjórnvöld mið af þeim sjónarmiðum sem koma fram í áliti mannréttindanefndar Sameinuðu þjóðanna í máli Arnar Snævars Sveinssonar og Erlings Sveins Haraldssonar, nr. 1306/2004, þegar teknar eru ákvarðanir sem lúta að stjórn fiskveiða og úthlutun byggðakvóta?
Þegar teknar eru ákvarðanir sem lúta að stjórn fiskveiða og úthlutun byggðakvóta er farið eftir gildandi lögum og stjórnvaldsreglum sem gilda um mál á hverjum tíma. Vert er að nefna að þegar hafa verið gerðar breytingar á fiskveiðistjórnarkerfinu, sbr. lög nr. 32/2010, um breytingu á lögum nr. 116/2006, í framhaldi af áliti mannréttindanefndar Sameinuðu þjóðanna, sem gera það m.a. mögulegt að strandveiðiafli nýtist sem mótframlag til byggðakvóta.
