Ferill 836. máls. Aðrar útgáfur af skjalinu: PDF - Word Perfect.
153. löggjafarþing 2022–2023.
Þingskjal 2280 — 836. mál.
Svar
félags- og vinnumarkaðsráðherra við fyrirspurn frá Andrési Inga Jónssyni um langvinn áhrif COVID-19.
1. Hversu mörg er talið að glími við skerta starfsgetu sem hluta af langvinnum eftirköstum sýkingar af völdum COVID-19? Svar óskast greint eftir kyni.
Ráðuneytið býr ekki yfir sjúkraskrárgögnum og getur því ekki svarað þessari fyrirspurn heildstætt. Á hinn bóginn þá hefur Tryggingastofnun ríkisins upplýsingar um hvaða sjúkdómsgreining er orsök örorku eða umsókna um endurhæfingarlífeyri. Nauðsynlegt er þó að setja fyrirvara við þær upplýsingar þar sem sjúkdómsgreiningar í læknisvottorðum vegna umsókna um endurhæfingarlífeyri og örorku eru yfirleitt frá einni og upp í á annan tug fyrir hvern umsækjanda. Því er oft veruleg óvissa um það hvaða sjúkdómar vega þyngst í óvinnufærni umsækjenda þótt ætla megi að fyrsta sjúkdómsgreining á læknisvottorði geri það.
Hér á eftir eru tölur um fjölda þeirra sem eru með eftirstöðvar COVID-19 sem eina af sjúkdómsgreiningum í læknisvottorði vegna örorku eða umsóknar um endurhæfingarlífeyri á árunum 2020–2022. Til samanburðar eru einnig lagðar fram tölur um fjölda þeirra sem eru með þreytuheilkenni skráð eftir veirusýkingu, þar sem í þeirri sjúkdómsgreiningu er ekki gerður greinarmunur á þeim veirum sem taldar eru liggja að baki (það er eingöngu gert vegna COVID-19 undir greiningarnúmerinu U09). Tölurnar eru bæði greindar eftir aldri og kyni. Tölurnar eftir aldri byggjast aðeins á fyrsta mati en tölurnar eftir kyni á öllum mötum.
Varðandi örorkumat fyrir árin 2020–2022 kemur t.d. eftirfarandi fram um nýgengi (fyrsta mat):
Þreytuheilkenni eftir veirusýkingu:
Yngri en 35 ára: 1.
35–50 ára: 16.
51–66 ára: 8.
Eftirstöðvar COVID-19:
Yngri en 35 ára: Enginn.
35–50 ára: 1.
51–66 ára: 2.
Varðandi endurhæfingarlífeyri fyrir árin 2020–2022 kemur t.d. eftirfarandi fram um nýgengi (fyrsta mat):
Þreytuheilkenni eftir veirusýkingu:
Yngri en 35 ára: 2.
35–50 ára: 5.
51–66 ára: 1.
Eftirstöðvar COVID-19:
Yngri en 35 ára: 3.
35–50 ára: 16.
51–66 ára: 8.
Kynjaskipting allra sjúkdómsgreininga í læknisvottorðum. Ekki er um nýgengi að ræða heldur allar sjúkdómsgreiningar í læknisvottorðum vegna umsókna um endurhæfingar- eða örorkulífeyri 2020–2022:
Örorkulífeyrir – karlar:
Þreytuheilkenni eftir veirusýkingu: 15.
Eftirstöðvar COVID-19: 4.
Örorkulífeyrir – konur:
Þreytuheilkenni eftir veirusýkingu: 81.
Eftirstöðvar COVID-19: 19.
Endurhæfingarlífeyrir – karlar:
Þreytuheilkenni eftir veirusýkingu: 21.
Eftirstöðvar COVID-19: 41.
Endurhæfingarlífeyrir – konur:
Þreytuheilkenni eftir veirusýkingu: 62.
Eftirstöðvar COVID-19: 89.
2. Hefur verið lagt mat á þjóðhagsleg áhrif þess, t.d. á vinnumarkað og almannatryggingakerfið?
Ráðuneytið hefur ekki upplýsingar um hvort mat hafi verið lagt á þjóðhagsleg áhrif COVID-19 á t.d. vinnumarkað og almannatryggingakerfið.
