Ferill 773. máls. Aðrar útgáfur af skjalinu: PDF - Word Perfect.
153. löggjafarþing 2022–2023.
Þingskjal 1408 — 773. mál.
Svar
félags- og vinnumarkaðsráðherra við fyrirspurn frá Halldóri Auðar Svanssyni um miðlunartillögu ríkissáttasemjara.
1. Í hvaða tilfellum á þessari öld hefur ríkissáttasemjari nýtt heimild í 28. gr. laga um stéttarfélög og vinnudeilur, nr. 80/1938, til að leggja fram miðlunartillögu til lausnar vinnudeilu?
2. Hversu langur tími leið þar til viðkomandi deilu var vísað til ríkissáttasemjara og þar til miðlunartillaga var lögð fram, í hverju tilfelli fyrir sig?
3. Hversu margar af miðlunartillögunum voru lagðar fram eftir að hlutaðeigandi stéttarfélag hafði hafið atkvæðagreiðslu um verkföll en áður en niðurstaða úr þeirri atkvæðagreiðslu lá fyrir?
4. Hversu margar af miðlunartillögunum voru svokallaðar innanhússtillögur, þar sem samninganefndir samþykkja tillöguna áður en hún er borin upp af hlutaðeigandi félögum?
Í 28. gr. laga um stéttarfélög og vinnudeilur, nr. 80/1938, er kveðið á um að eigi tvö eða fleiri félög eða félagasambönd saman í deilu geti sáttasemjari í samráði við samninganefndir borið fram eina miðlunartillögu sem taki til fleiri en eins deiluaðila eða þeirra allra. Samkvæmt upplýsingum frá embætti ríkissáttasemjara hefur sáttasemjari aldrei á þessari öld lagt fram miðlunartillögu til lausnar vinnudeilu á grundvelli fyrrnefndrar 28. gr. laga um stéttarfélög og vinnudeilur.
5. Hver er afstaða ráðherra til þess að ríkissáttasemjari leggi fram miðlunartillögu sem ekki er samþykkt af samninganefndum?
Að mati ráðherra er ekki gert ráð fyrir því í lögum um stéttarfélög og vinnudeilur, nr. 80/1938, að miðlunartillaga sé samþykkt af samninganefndum aðila í vinnudeilu áður en sáttasemjari leggur fram slíka tillögu þar sem í ákvæðum laganna er gert ráð fyrir að miðlunartillögur séu einungis lagðar fram í þeim tilvikum þegar samningaumleitanir sáttasemjara hafa ekki borið árangur.
