Ferill 725. máls. Aðrar útgáfur af skjalinu: PDF - Word Perfect.
153. löggjafarþing 2022–2023.
Þingskjal 1564 — 725. mál.
Svar
matvælaráðherra við fyrirspurn frá Indriða Inga Stefánssyni um varðveislu eggja.
Fyrirspurnin hljóðar svo:
Hefur farið fram greining á því hvort spara mætti orku ef ekki væri lengur krafa um að þvo egg áður en þau eru færð í geymslu, líkt og tíðkast annars staðar í Evrópu?
Ekki er hefð fyrir þvotti á eggjum í Evrópu og lengi vel var slíkur þvottur bannaður. Þvotturinn er þó heimill í dag og um hann er mælt fyrir í reglugerð (ESB) 2008/589 en sú gerð fellur utan við gildissvið EES-samningsins.
Á Íslandi er ekki gerð krafa um þvott á eggjum áður en þau eru færð í geymslu. Egg sem seld eru neytendum skulu vera með heila og ósprungna skurn og mjög óhrein egg skulu tekin frá. Engu að síður er heimilt að þvo egg en aðili sem þvær og pakkar eggjum þarf starfsleyfi frá Matvælastofnun. Sú krafa er gerð því að mikilvægt er að egg séu þvegin á réttan hátt, þar sem hætta er á því að þvotturinn eyðileggi náttúrulega vörn eggja gegn sýklum og auki hættu á að smit komist inn í eggin. Samkvæmt upplýsingum ráðuneytisins hafa sjö fyrirtæki leyfi frá Matvælastofnun til eggjaþvottar.
Þar sem hér á landi er ekki í gildi lagaskylda til eggjaþvottar hefur orkusparnaður ekki verið metinn í því samhengi.
