Ferill 715. máls. Aðrar útgáfur af skjalinu: PDF - Word Perfect.
153. löggjafarþing 2022–2023.
Þingskjal 1229 — 715. mál.
Svar
matvælaráðherra við fyrirspurn frá Hönnu Katrínu Friðriksson um sauðfjárrækt.
1. Hver eru óútskýrð afföll sauðfjár í lausagöngu á hverju ári sl. 10 ár?
Ráðuneytið hefur ekki upplýsingar um óútskýrð afföll sauðfjár eftir því hvort lausaganga er leyfð á viðkomandi beitarsvæðum.
2. Hvernig mun ráðherra vinna að því að sauðfé sé ekki beitt á svæðum sem eru hættuleg með tilliti til dýraverndarsjónarmiða?
Beitarsvæði sauðfjár í landinu hafa ekki verið flokkuð með tilliti til dýraverndarsjónarmiða. Samkvæmt lögum um velferð dýra, nr. 55/2013, bera umráðamenn ábyrgð á því að annast sé um dýr í samræmi við lögin og í því felst meðal annars að tryggja dýrum góða umönnun og vernda þau gegn hættu, sbr. 14. gr. laganna. Matvælastofnun annast eftirlit með að ákvæðum laganna sé framfylgt.
3. Hvernig mun ráðherra vinna að því að sauðfé sé ekki beitt á svæðum sem eru óheilnæm með tilliti til manneldissjónarmiða, til að mynda vegna notkunar plöntuverndarvara, mengunar o.fl.?
Um framleiðslu matvæla til manneldis gilda lög nr. 93/1995. Matvælastofnun og heilbrigðisnefndir sveitarfélaga annast eftirlit með því að ákvæðum þeirra sé framfylgt. Í lögunum eru margvísleg ákvæði til að tryggja öryggi matvæla, m.a. vegna þeirra þátta sem fram koma í fyrirspurninni. Ekki er í gildi sérstakt bann við beit sauðfjár á svæðum sem hugsanlega gætu talist óheilnæm, en skv. 13. gr. d laga um matvæli mega sláturdýr ekki bera leifar lyfja eða annarra aðskotaefna sem geta verið hættuleg heilsu neytenda Einnig ber að líta til þess að umráðamenn bera ábyrgð á velferð dýra, líkt og nánar er lýst í svari við 2. tölul. fyrirspurnarinnar, og ber því að gæta að gæðum beitarsvæða.
Þá má einnig benda á þær reglur sem gilda um plöntuverndarvörur og notkun þeirra.
4. Hvernig mun ráðherra stuðla að því að neytendur fái upplýsingar um beitarsvæði vegna afurða sauðfjárræktar sem seldar eru í verslunum, svo að þeir geti tekið upplýsta ákvörðun um neyslu sína á grundvelli dýraverndarsjónarmiða, manneldissjónarmiða og umhverfisverndar?
Ráðuneytið er fylgjandi því að neytendur fái sem gleggstar upplýsingar um þær matvörur sem þeir kaupa, til að auðvelda upplýsta ákvarðanatöku, og gildir það bæði um afurðir sauðfjár sem aðrar. Um merkingar fer eftir ákvæðum matvælalaga, nr. 93/1995. Lögin taka mið af því að matvæli eru í frjálsu flæði á Evrópska efnahagssvæðinu og gilda hér á landi ítarlegar EES-reglur um miðlun upplýsinga um matvæli til neytenda. Ákveðin skilyrði eru því fyrir skyldubundnum merkingum að kröfu stjórnvalda, en framleiðendum er frjálst að gefa frekari upplýsingar.
