Ferill 649. máls. Aðrar útgáfur af skjalinu: PDF - Word Perfect.
153. löggjafarþing 2022–2023.
Þingskjal 1948 — 649. mál.
Svar
mennta- og barnamálaráðherra við fyrirspurn frá Indriða Inga Stefánssyni um markmið hæfniviðmiða í skólaíþróttum.
1. Telur ráðherra hæfniviðmið aðalnámskrár í skólaíþróttum varðandi líkamlega getu vera réttlætanleg í ljósi ólíks líkamlegs atgervis nemenda og náttúrulegra eiginleika þeirra?
Í aðalnámskrá grunnskóla frá árinu 2011, með síðari breytingum, er fjallað um heilbrigði og velferð sem einn af grunnþáttum í skólastarfi. Heilbrigði byggist á andlegri, líkamlegri og félagslegri vellíðan sem ræðst af flóknu samspili einstaklings, aðstæðna og umhverfis. Börn og ungmenni verja stórum hluta dagsins í skóla og í samræmi við framangreint skal skólastarf skipulagt til að efla heilbrigði og stuðla markvisst að velferð og vellíðan nemenda.
Námsgreinin skólaíþróttir gegnir veigamiklu hlutverki í hreyfi- og heilsuuppeldi nemenda. Nemendur læra grunnfærni í ýmsum íþróttagreinum og einnig hvernig íþróttaiðkun og hreyfing almennt nýtist einstaklingum út lífið sem geti þá einnig tekið ákvarðanir um eigin þjálfun og hreyfingu. Við skipulagningu skólaíþrótta skulu öll hæfniviðmið höfð í huga. Sama á við um þann ramma sem námssviðinu er markaður í viðmiðunarstundaskrá í almennum hluta aðalnámskrár.
Í aðalnámskrá er tekið fram að verklegir tímar skuli skipulagðir þannig að hver nemandi sé virkur í verkefnum við hæfi. Til viðbótar er sérstaklega kveðið á um í aðalnámskrá að kennarar skuli koma til móts við þá sem ekki fylgi hópnum eða líði illa í skólaíþróttum og finna þeim verkefni og hreyfingu við hæfi og að tekið skuli tillit til getu og stöðu hvers og eins.
2. Hefur farið fram eða stendur yfir vinna á vegum ráðuneytisins um að endurskoða markmið íþróttakennslu í skólum með tilliti til ólíkrar samsetningar nemendahópa?
Endurskoðun greinasviða aðalnámskrár grunnskóla stendur yfir og er áætlað að fyrstu niðurstöður þeirrar vinnu verði birtar á fyrri hluta árs 2024. Íþróttafræðileg þekking hefur ekki breyst mikið frá því að námskráin var sett og því er ólíklegt að markmiðin sem slík breytist mikið. Mikilvægt er hins vegar að tekið sé mið af ólíkum nemendahópum í útfærslu kennslu og, eins og áður greinir, að hver nemandi sé virkur í verkefnum við hæfi.
