Ferill 1126. máls. Aðrar útgáfur af skjalinu: PDF - Word Perfect.
153. löggjafarþing 2022–2023.
Þingskjal 2149 — 1126. mál.
Svar
dómsmálaráðherra við fyrirspurn frá Ingu Sæland um lögfræðiálit Lagastofnunar HÍ.
1. Hversu háa fjárhæð greiddi ráðuneytið fyrir álitsgerð sem Lagastofnun HÍ vann um upplýsingarétt þingnefnda skv. 51. gr. laga um þingsköp og umsagnir stjórnvalda skv. 6. gr. laga um íslenskan ríkisborgararétt?
Alls greiddi ráðuneytið Lagastofnun HÍ 272.800 kr. fyrir álitsgerðina.
2. Hvaða gögn afhenti Útlendingastofnun allsherjar- og menntamálanefnd í kjölfar beiðni nefndarinnar með vísan til 51. gr. laga um þingsköp í desember 2021 og hvaða umbeðin gögn voru ekki afhent?
Hinn 25. janúar 2022 sendi Útlendingastofnun Alþingi allar óafgreiddar umsóknir um íslenskan ríkisborgararétt sem stofnunin hafði veitt viðtöku en beint var til Alþingis og borist höfðu á tímabilinu 1. október 2021 eða fyrr. Nánar tiltekið þá sendi stofnunin Alþingi öll fyrirliggjandi umsóknargögn, þ.e. umsóknina sjálfa og þau fylgiskjöl sem umsækjandi skilaði með umsókn. Útlendingastofnun skilaði ekki skriflegri umsögn stofnunarinnar um framangreindar umsóknir, auk þess sem umsagna lögreglu var ekki aflað, enda lágu umrædd gögn ekki fyrir og þurfti að vinna umsagnir sérstaklega vegna hverrar og einnar umsóknar. Slíkra umsagna Útlendingastofnunar og lögreglu ber að afla á grundvelli 2. mgr. 6. gr. laga um íslenskan ríkisborgararétt, nr. 100/1952. Framangreind upplýsingagjöf Útlendingastofnunar var þannig í samræmi við niðurstöðu lögfræðiálits Lagastofnunar HÍ, allar fyrirliggjandi upplýsingar voru afhentar til samræmis við skyldu stjórnvalda skv. 51. gr. þingskapalaga.
