Ferill 1100. máls. Aðrar útgáfur af skjalinu: PDF - Word Perfect.
153. löggjafarþing 2022–2023.
Þingskjal 1933 — 1100. mál.
Svar
dómsmálaráðherra við fyrirspurn frá Bryndísi Haraldsdóttur um endurmat útgjalda.
Hefur ráðuneytið innleitt endurmat útgjalda samkvæmt skilgreiningu Efnahags- og framfarastofnunarinnar (OECD)? Ef svo er, hvenær var það gert og hvaða árangri hefur það skilað?
Ráðuneytið fór að frumkvæði fjármála- og efnahagsráðuneytisins af stað með verkefni á árinu 2018 um endurmat útgjalda er laut að sýslumönnum. Greiningin bar kennsl á ýmis tækifæri til hagræðingar í útgjöldum embættanna og ber þar sérstaklega að nefna aukna verkaskiptingu og sérhæfingu á landsvísu, endurskoðun á aðkeyptri þjónustu og betri nýtingu húsnæðis embættanna á landsbyggðinni. Ekki var lokið við verkefnið undir þeim formerkjum, en dómsmálaráðuneytið byggði hins vegar á þeim greiningum sem verkefnið skilaði og lauk við allsherjarúttekt á sýslumannsembættunum með útgáfu skýrslu árið 2021 sem ber heitið Sýslumenn - Framtíðarsýn; umbætur á þjónustu og rekstri, sbr. þskj. 1043, 609. mál á 151. löggjafarþingi 2020–2021. Í skýrslunni er lagt til að meginmarkmiðin um bætta þjónustu, bætta stjórnun og rekstur og aukið framboð þjónustu verði sett í forgang hjá embættunum. Eftirfylgni með markmiðunum felst í gagngerri endurskoðun á skipulagi sýslumannsembætta sem felst nánar tiltekið í því að efla þá starfsemi sem fyrir er ásamt því að mynda eina heildstæða þjónustustofnun, eins konar stjórnsýslustöð ríkis í héraði sem veitir framúrskarandi þjónustu óháð staðsetningu borgarans eða stjórnsýslustöðvarinnar. Með niðurfellingu lögsagnarumdæma, ríkara samstarfi á milli starfsstöðva og aukinni áherslu á stafræna þjónustu verður hægt að byggja upp mismunandi sérhæfingu á hverjum stað sem þjónar öllu landinu og getur auk þess tekið við auknum verkefnum hins opinbera. Hver starfsstöð verður því áfram öflugur vinnustaður í héraði, þjónusta við borgarana verður betri, reksturinn hagkvæmari og stjórnsýslan skilvirkari. Þessar áherslur eru settar fram í lagafrumvarpi um sameiningu núverandi níu sýslumannsembætta í eitt embætti og bíður frumvarpið afgreiðslu þingflokka ríkisstjórnar. Að auki er ráðuneytið með áform um að leggja fyrir 154. löggjafarþing 2023–2024 frumvarp til breytinga á ýmsum lögum er varða verkefni sýslumanna sem miðar fyrst og fremst að því að ryðja úr vegi frekari hindrunum fyrir innleiðingu stafrænnar málsmeðferðar. Framangreind lagafrumvörp og þær viðbótarfjárheimildir sem fengust með fjárlögum fyrir árið 2023 með breyttri forgangsröðun innan heildarramma dómsmálaráðuneytisins er ætlað að styðja frekar við framangreindar áherslur og markmið og tryggja að unnt verði að ráðast í nauðsynlegar umbreytingar á starfsemi sýslumannsembættanna þannig að þau geti orðið leiðandi fyrir rafræna þjónustu ríkisins.
