Ferill 1099. máls. Aðrar útgáfur af skjalinu: PDF - Word Perfect.
153. löggjafarþing 2022–2023.
Þingskjal 2160 — 1099. mál.
Svar
félags- og vinnumarkaðsráðherra við fyrirspurn frá Bryndísi Haraldsdóttur um endurmat útgjalda.
Fyrirspurnin hljóðar svo:
Hefur ráðuneytið innleitt endurmat útgjalda samkvæmt skilgreiningu Efnahags- og framfarastofnunarinnar (OECD)? Ef svo er, hvenær var það gert og hvaða árangri hefur það skilað?
Verkefni um endurmat útgjalda er á forræði fjármála- og efnahagsráðuneytis. Félags- og vinnumarkaðsráðuneytið hefur frá árinu 2020 tekið þátt í tilraunaverkefni með fjármála- og efnahagsráðuneytinu um endurmat útgjalda þar sem kerfi örorkulífeyris og starfsendurhæfingar hafa verið til gagngerrar skoðunar. Farið var ítarlega yfir núgildandi kerfi, þróun og tækifæri til úrbóta, en lokaskil hafa ekki átt sér stað. Eigi að síður hefur sú mikla vinna sem unnin var þar verið góður grunnur og nýst við heildarendurskoðun örorkulífeyriskerfisins sem nú stendur yfir. Stærsti áfangi endurskoðunarinnar, um starfsendurhæfingu og nýtt greiðslukerfi, verður lagður fyrir Alþingi sem frumvarp á næsta löggjafarþingi. Það er í takt við markmið verkefna af þessum toga þar sem leitast er við að öðlast betri yfirsýn yfir ráðstöfun opinberra fjármuna, fá tækifæri til hagræðingar og/eða að breyta forgangsröðun í ríkisútgjöldum.
