Ferill 1096. máls. Aðrar útgáfur af skjalinu: PDF - Word Perfect.
153. löggjafarþing 2022–2023.
Þingskjal 2181 — 1096. mál.
Svar
innviðaráðherra við fyrirspurn frá Bryndísi Haraldsdóttur um endurmat útgjalda.
Fyrirspurnin hljóðar svo:
Hefur ráðuneytið innleitt endurmat útgjalda samkvæmt skilgreiningu Efnahags- og framfarastofnunarinnar (OECD)? Ef svo er, hvenær var það gert og hvaða árangri hefur það skilað?
Fjármála- og efnahagsráðuneytið stendur að endurmati útgjalda í samvinnu við fagráðuneyti. Verklag hefur verið kynnt og vinna farið fram á afmörkuðum sviðum. Engin vinna hefur átt sér stað með innviðaráðuneyti á grunni endurmats útgjalda.
Innviðaráðuneyti leggur áherslu á að fyrir liggi stefnur og aðgerðaáætlanir í öllum málaflokkum í formi þingsályktana. Það tryggir yfirsýn, forgangsröðun fjármuna og byggist á víðtæku samráði. Eins fylgist ráðuneytið með framvindu aðgerða og mælikvarða og birtir opinberlega á vefsíðunni vegvisir.is. Árangur og útgjöld eru því skoðuð í samhengi og samfélagslegur ávinningur aðgerða metinn í auknum mæli, t.d. umfangsmeiri vegaframkvæmdir.
Fylgst er með þróun útgjalda á milli ára. Þannig eru útgjöld t.d. skoðuð í samanburði við helstu vísitölur, hlutfall heildarútgjalda ríkisins og hlutfall vergrar landsframleiðslu. Þróun útgjalda í málaflokkum ráðuneytisins á síðustu árum sýnir að útgjöldin hafa að mestu leyti verið lægri en þróun vísitalna og þróun heildarútgjalda ríkissjóðs. Í þeim tilvikum sem útgjöld hafa aukist umfram verðlag er um að ræða sérstakar ákvarðanir þingsins, t.d. tengdar fjárfestingarátaki í heimsfaraldri. Sem dæmi um endurmat útgjalda má nefna að flutningssjóður olíuvara var lagður niður með lögum og með því lækkaði útgjaldarammi um 218 milljónir króna árið 2021.
