Ferill 1093. máls. Aðrar útgáfur af skjalinu: PDF - Word Perfect.
153. löggjafarþing 2022–2023.
Þingskjal 2237 — 1093. mál.
Svar
mennta- og barnamálaráðherra við fyrirspurn frá Bryndísi Haraldsdóttur um endurmat útgjalda.
Fyrirspurnin hljóðar svo:
Hefur ráðuneytið innleitt endurmat útgjalda samkvæmt skilgreiningu Efnahags- og framfarastofnunarinnar (OECD)? Ef svo er, hvenær var það gert og hvaða árangri hefur það skilað?
Árið 2018 ákvað ríkisstjórnin að hefja innleiðingu nýs verklags um reglulegt endurmat ríkisútgjalda, sbr. fjárlagafrumvarp ársins 2019 og fjármálaáætlun 2020–2024. Fjármála- og efnahagsráðuneyti hefur forræði á verkefninu. Markmið með reglulegu endurmati ríkisútgjalda endurspegla breytingar undanfarinna ára í kjölfar setningar laga nr. 123/2015, um opinber fjármál. Endurmat ríkisútgjalda felur í sér greiningu reglubundinna og viðvarandi verkefna, málaflokka eða málefnasviða með það að markmiði að draga fram skilvirkni, árangur og greina frávik og undirliggjandi þætti sem hafa haft áhrif á útgjaldaþróun. Niðurstöður þessara greininga eru grundvöllur þess að hægt sé að forgangsraða fjármunum og veita þá í verkefni sem skila þjóðhagslegum ábata.
Eitt verkefni sem tilheyrði þáverandi mennta- og menningarmálaráðuneyti var tekið til endurmats en það verkefni varðaði málefni framhaldsfræðslu. Eftir breytingar á skipan ráðuneyta og stjórnarmálefna árið 2022 heyrir framhaldsfræðsla undir félags- og vinnumarkaðsráðuneyti. Verkefnið fór í gegnum formlegt ferli endurmats útgjalda. Niðurstaða þeirrar vinnu var ófullnægjandi með tilliti til þeirrar aðferðafræði sem endurmat útgjalda krefst. Engu að síður nýttist vinna starfshópsins til endurskoðunar á málefnum framhaldsfræðslunnar.
