Ferill 1012. máls. Aðrar útgáfur af skjalinu: PDF - Word Perfect.
153. löggjafarþing 2022–2023.
Þingskjal 2009 — 1012. mál.
Svar
mennta- og barnamálaráðherra við fyrirspurn frá Bryndísi Haraldsdóttur um ráð, nefndir, stjórnir, starfshópa og stýrihópa.
Fyrirspurnin hljóðar svo:
Hvað voru á árinu 2022 stofnaðar margar nýjar nefndir, stjórnir, ráð, stýrihópar eða starfshópar sem heyra undir ráðuneytið og hver er áætlaður kostnaður vegna þeirra?
Alls voru stofnaðar 11 nýjar nefndir, stjórnir, ráð, stýrihópar eða starfshópar á vegum ráðuneytisins árið 2022. Í samræmi við orðalag fyrirspurnar eru ekki taldar með nefndir, stjórnir, ráð, stýrihópar eða starfshópar sem stofnaðir voru fyrir tímamarkið en voru starfandi árið 2022 eða endurskipaðir á árinu, enda teljast þeir ekki nýir í framangreindum skilningi. Eftirfarandi eru nýjar nefndir, stjórnir, ráð, stýrihópar eða starfshópar sem stofnaðir voru á árinu 2022:
1. Þjóðarhöll í innanhúsíþróttum – framkvæmdanefnd.
2. Ráðgjafaráð vegna uppbyggingar þjóðarhallar í innanhúsíþróttum.
3. Starfshópur um undirbúning uppbyggingar þjóðarleikvanga í íþróttum.
4. Starfshópur um undirbúning uppbyggingar þjóðarleikvangs í innanhúsíþróttum.
5. Verkefnisstjórn um framtíðarhúsnæði Tækniskólans.
6. Stýrihópur um fyrirkomulag þjónustu við börn með fjölþættan vanda.
7. Stýrihópur um aðgengi að þjónustu fyrir börn.
8. Starfshópur um framtíðarfyrirkomulag á Reykjum og Reykjatorfunni.
9. Starfshópur um innleiðingu breytinga á barnaverndarlögum.
10. Starfshópur um mótun leiðbeininga fyrir starfsfólk og stjórnendur grunnskóla um viðbrögð við atvikum sem upp kunna að koma í skólastarfi, sbr. reglugerð um ábyrgð og skyldur aðila skólasamfélagsins í grunnskólum.
11. Samráðs- og viðbragðsteymi íslenskra stjórnvalda fyrir börn á flótta.
Heildarkostnaður við vinnu í tengslum við þjóðarhöll og þjóðarleikvanga var 17.680.000 kr. Kostnaður við aðrar nýjar nefndir, stjórnir, ráð og hópa er enginn. Hér er ekki tilgreindur kostnaður vegna starfa ráðherra, aðstoðarmanna og starfsmanna ráðuneytisins í tengslum við nefndastörfin.
