Markmið: Að skýra og styrkja ferli við mat á fjárhagslegum áhrifum stjórnarfrumvarpa, stjórnvaldsfyrirmæla og annarra stefnumarkandi ákvarðana ríkisins á sveitarfélög, m.a. með því að festa í sessi samráð og skýran farveg fyrir úrlausn ágreiningsmála milli ríkis og sveitarfélaga.

Helstu breytingar og nýjungar: Lagt er til að ráðherra skuli tryggja að fram fari sérstakt mat á fjárhagslegum áhrifum stjórnarfrumvarpa, stjórnvaldsfyrirmæla og annarra stefnumarkandi ákvarðana ríkisins á sveitarfélög þegar slík áhrif eru fyrirsjáanleg. Matinu er ætlað að greina markmið og tilætluð áhrif, þjónustukröfur og fjármögnun kostnaðar og skal það sent Sambandi íslenskra sveitarfélaga til umsagnar áður en frumvarp er afgreitt úr ríkisstjórn til framlagningar á Alþingi eða áður en ákvörðun er endanlega tekin. Verði ágreiningur um niðurstöðu matsins má vísa ágreiningsefninu til samstarfsnefndar ríkis og sveitarfélaga. Komi í ljós að mat hafi ekki farið fram þrátt fyrir ljós áhrif skal ráðherra grípa til viðeigandi ráðstafana sem geta m.a. falist í breytingu á fjármögnun eða þjónustukröfum.

Breytingar á lögum og tengd mál: Sveitarstjórnarlög, nr. 138/2011.

Kostnaður og tekjur: Ekki er gert ráð fyrir áhrifum á ríkissjóð.

Afgreiðsla: Afgreitt úr nefnd til 2. umræðu.

Efnisflokkar: Stjórnarskipan og stjórnsýsla: Sveitarstjórnarmál