262. mál: Markaðir fyrir sýndareignir

Samantekt

Markmið: Að innleiða reglugerð (ESB) 2023/1114 um markaði fyrir sýndareignir í íslenskan rétt til að tryggja réttarvissu og styðja nýsköpun á sviði sýndareigna, efla neytenda- og fjárfestavernd og heilleika markaða fyrir sýndareignir auk þess að stuðla að fjármálastöðugleika.

Helstu breytingar og nýjungar:

Lagt er til að reglugerð (ESB) 2023/1114 um markaði fyrir sýndareignir (MiCA) verði lögfest hér á landi og að Seðlabanki Íslands, í gegnum Fjármálaeftirlitið, fari með eftirlit. Lagt er til að útgefendur eignatengdra tóka og rafeyristóka verði háðir starfsleyfi og, eftir atvikum, birtingu hvítbókar með öllum nauðsynlegum upplýsingum um viðkomandi tóka, í samræmi við reglugerðina. Gert er ráð fyrir að þjónustuveitendur sýndareigna verði jafnframt háðir starfsleyfi eða skráningu. Kveðið er á um ráðstafanir vegna hagsmunaárekstra, bann við markaðsmisnotkun, íhlutunarheimildir (m.a. tímabundnar takmarkanir á markaðssetningu, dreifingu eða sölu) og stjórnvaldssektir. Jafnframt er lagt til að breyta lögum nr. 140/2018 vegna reglugerðar (ESB) 2023/1113 um upplýsingar sem fylgja skulu millifærslum fjármuna og tiltekinna sýndareigna.

Breytingar á lögum og tengd mál: Um er að ræða ný lög og við gildistöku þeirra verða breytingar á lögum um opinbert eftirlit með fjármálastarfsemi, nr. 87/1998, lögum um greiðslu kostnaðar við opinbert eftirlit með fjármálastarfsemi og skilavald, nr. 99/1999, lögum um fjármálafyrirtæki, nr. 161/2002, lögum um evrópskt eftirlitskerfi á fjármálamarkaði, nr. 24/2017, og lögum um aðgerðir gegn peningaþvætti og fjármögnun hryðjuverka, nr. 140/2018.

Kostnaður og tekjur: Ekki er gert ráð fyrir teljandi áhrifum á ríkissjóð.

Aðrar upplýsingar:

Reglugerð Evrópuþingsins og ráðsins (ESB) 2023/1114 frá 31. maí 2023 um markaði fyrir sýndareignir og um breytingu á reglugerðum (ESB) nr. 1093/2010 og (ESB) nr. 1095/2010 og tilskipunum 2013/36/ESB og (ESB) 2019/1937 (MiCA).

Reglugerð Evrópuþingsins og ráðsins (ESB) 2023/1113 frá 31. maí 2023 um upplýsingar sem fylgja skulu við millifærslu fjármuna og tiltekinna sýndareigna og um breytingu á tilskipun (ESB) 2015/849.

Löggjöf á Norðurlöndum

Danmörk

Lov om ændring af lov om finansiel virksomhed, lov om betalinger, lov om kapitalmarkeder og forskellige andre love LOV nr 481 af 22/05/2024.

Finnland

Lag om leverantörer av kryptotillgångstjänster och om marknader för kryptotillgångar 402/2024.

Noregur

Lov om kryptoeiendeler (kryptoeiendelsloven) LOV-2025-05-27-20.

Svíþjóð

Lag med kompletterande bestämmelser till EU:s förordning om marknader för kryptotillgångar (2024:1159).

Afgreiðsla: Afgreitt úr nefnd til 2. umræðu.

Efnisflokkar: Erlend samskipti: Alþjóðasamningar og utanríkismál | Hagstjórn: Efnahagsmál | Atvinnuvegir: Tölvu- og upplýsingamál | Atvinnuvegir: Viðskipti

262 | Markaðir fyrir sýndareignir

Þingskjöl