Markmið: Að stuðla að stafrænum viðnámsþrótti aðila á fjármálamarkaði með samræmdum kröfum um áhættustýringu og viðbúnað þannig að lágmarka megi rof á mikilvægri fjármálaþjónustu. Að stefna að því að varðveita fjármálastöðugleika og tryggja öfluga vernd fjárfesta og neytenda. 

Helstu breytingar og nýjungar: Lagt er til að reglugerð (ESB) 2022/2554 um stafrænan rekstrarlegan viðnámsþrótt fyrir fjármálageirann (DORA) verði lögfest; reglugerðin setur samræmdar kröfur um stýringu upplýsinga- og fjarskiptatækniáhættu, viðbrögð og skýrslugjöf vegna alvarlegra tæknilegra atvika, prófanir á stafrænum viðnámsþrótti og áhættustýringu vegna þriðju aðila og útvistunar upplýsinga- og fjarskiptatækniþjónustu. Gert er ráð fyrir að Seðlabanki Íslands verði lögbært yfirvald, þ.á.m. vegna ógnamiðaðra innbrotsprófana. Þá er gert ráð fyrir að Fjármálaeftirlitið hafi eftirlit með því að eftirlitsskyldir aðilar fylgi reglunum og hafi heimildir til upplýsingaöflunar og til að gera kröfur um úrbætur. Enn fremur er lagt til að brot varði viðurlögum, þ.m.t. stjórnvaldssektum og dagsektum.

Breytingar á lögum og tengd mál: Um er að ræða ný lög en við gildistöku þeirra verða breytingar á lögum um verðbréfasjóði, nr. 116/2021, lögum um vátryggingastarfsemi, nr. 100/2016, lögum um rekstraraðila sérhæfðra sjóða, nr. 45/2020, lögum um fjármálafyrirtæki, nr. 161/2002, lögum um markaði fyrir fjármálagerninga, nr. 115/2021, lögum um greiðsluþjónustu, nr. 114/2021, lögum um öryggi net- og upplýsingakerfa mikilvægra aðila, nr. 78/2019, lögum um lánshæfismatsfyrirtæki, nr. 50/2017, lögum um afleiðuviðskipti, miðlæga mótaðila og afleiðuviðskiptaskrár, nr. 15/2018, lögum um verðbréfamiðstöðvar, uppgjör og rafræna eignarskráningu fjármálagerninga, nr. 7/2020, lögum um fjárhagslegar viðmiðanir, nr. 7/2021, og lögum um skyldutryggingu lífeyrisréttinda og starfsemi lífeyrissjóða, nr. 129/1997.

Kostnaður og tekjur: Gert er ráð fyrir að innleiðingin muni fela í sér aukin verkefni fyrir Fjármálaeftirlitið. Þótt tölulegt mat liggi ekki fyrir er gert ráð fyrir að mögulegum viðbótarútgjöldum og mönnun verði mætt að hluta eða öllu leyti með hækkun eftirlitsgjalds. Að öðru leyti er ekki búist við beinum áhrifum á ríkissjóð.

Aðrar upplýsingar:

Afgreiðsla: Afgreitt úr nefnd til 2. umræðu.

Efnisflokkar: Erlend samskipti: Alþjóðasamningar og utanríkismál  |  Atvinnuvegir: Tölvu- og upplýsingamál  |  Atvinnuvegir: Viðskipti