Lagt er til að fella brott ákvæði um stjórn Tryggingastofnunar ríkisins og gera nauðsynlegar tæknilegar breytingar í kjölfarið. Jafnframt er lagt til að aldursviðbót greiðist áfram með ellilífeyri til þeirra ellilífeyrisþega sem áttu rétt til örorku- eða hlutaörorkulífeyris áður en taka ellilífeyris hófst þannig að viðbótin bætist við fjárhæð ellilífeyris. Gert er ráð fyrir að um aldursviðbót gildi sömu reglur og um ellilífeyri, m.a. um réttindahlutfall, frestun eða flýtingu töku og töku hálfs áunnins ellilífeyris, og að tekjutenging fylgi sömu 45% skerðingarreglu. Þá er lagt til að árlegar breytingar á fjárhæðum almannatrygginga taki mið af þróun launavísitölu Hagstofu Íslands. Loks er lagt til að Tryggingastofnun haldi skrá á landsvísu um framvindu meðferðar og endurhæfingar, óháð því hvort hlutaðeigandi hafi sótt um eða fái greiðslur úr almannatryggingum, og að vinnsla persónuupplýsinga fari fram samkvæmt nánari reglum í samráði við Persónuvernd.

Lög um breytingu á ýmsum lögum vegna endurskoðunar örorkulífeyriskerfis almannatrygginga, nr. 104/2024.

Gert er ráð fyrir að tenging við launavísitölu geti, verði þróunin í samræmi við síðustu ár, aukið útgjöld ríkissjóðs vegna almannatrygginga og tengdra greiðslna um allt að 3–4 milljarða kr. á ári. Þá er gert ráð fyrir að kostnaður ríkissjóðs við að viðhalda aldursviðbót með ellilífeyri verði um 300 milljónir kr. á ári.