225. mál: Fæðingar- og foreldraorlof

Samantekt

Markmið: Að bregðast við athugasemdum um innleiðingu EES-reglna um samræmingu almannatryggingakerfa og tryggja að foreldrar sem hafa starfað í öðru EES-ríki á viðmiðunartímabili tekna verði ekki verr settir við útreikning greiðslna. Að skýra nánar hvenær tímabundin stöðvun atvinnuleitar vegna orlofs erlendis telst áfram til þátttöku á innlendum vinnumarkaði.

Helstu breytingar og nýjungar:

Lagt er til að tímabundið hlé á atvinnuleit vegna orlofs erlendis teljist til þátttöku á innlendum vinnumarkaði hjá foreldri sem fær greiddar atvinnuleysisbætur, enda líði ekki meira en tíu virkir dagar frá því að atvinnuleit var hætt þar til hún hefst að nýju og öðrum skilyrðum sé fullnægt. Þá er lagt til að þegar foreldri hefur starfað hér á landi skemur en fjóra mánuði á viðmiðunartímabili en jafnframt starfað að hluta eða öllu leyti erlendis á sama tímabili samkvæmt viðeigandi alþjóðasamningum, verði greiðslur úr Fæðingarorlofssjóði reiknaðar út frá meðaltali heildarlauna í þeim almanaksmánuðum sem foreldri hafði tekjur hérlendis fyrir fæðingarmánuð barns eða þegar barn kemur inn á heimili við frumættleiðingu eða varanlegt fóstur. Með þessu er tryggt að mánuðir á viðmiðunartímabilinu þar sem foreldri hafði ekki laun hér á landi dragi ekki meðaltalið niður. Í slíkum tilvikum skal foreldri leggja fram vottorð um starfs- og tryggingatímabil erlendis með umsókn.

Breytingar á lögum og tengd mál: Lög um fæðingar- og foreldraorlof nr. 144/2020.

Kostnaður og tekjur: Gert er ráð fyrir óverulegum áhrifum á ríkissjóð.

Aðrar upplýsingar: Reglugerð Evrópuþingsins og ráðsins (EB) nr. 883/2004 frá 29. apríl 2004 um samræmingu almannatryggingakerfa.

Afgreiðsla: Samþykkt óbreytt.

Efnisflokkar: Samfélagsmál: Almannatryggingar | Erlend samskipti: Alþjóðasamningar og utanríkismál | Samfélagsmál: Atvinnumál | Samfélagsmál: Félagsmál

225 | Fæðingar- og foreldraorlof (EES-reglur o.fl.)

Þingskjöl

Umsagnir