230. mál: Landlæknir og lýðheilsa og sjúkraskrár

Samantekt

Markmið: Að setja ítarleg ákvæði um tilgang heilbrigðisskráa, öflun upplýsinga í slíkar skrár, rekstur þeirra og notkun. Að tryggja lagastoð fyrir stofnun og rekstri gæðaskráa af hálfu heilbrigðisstofnana og starfsstofa heilbrigðisstarfsfólks. Að hraða og bæta meðferð kvörtunar- og kærumála með því að heimila heilbrigðisyfirvöldum aðgang að rafrænum sjúkraskrám.

Helstu breytingar og nýjungar:

Lagt er til að sett verði ítarlegri ákvæði um heilbrigðisskrár til að afla þekkingar um heilbrigðisþjónustu og þá þætti sem hafa áhrif á heilsu einstaklinga. Gert er ráð fyrir að þrjár núverandi skrár verði sameinaðar í eina samskiptaskrá heilbrigðisþjónustu og að heimilað verði að stofna skrár með víðtækari heilsuupplýsingum sem byggjast á samþykki einstaklinga. Kveðið er á um skýrari reglur um öflun gagna, öryggi og aðgang að upplýsingum, auk skyldu heilbrigðisþjónustuaðila til að veita landlækni nauðsynleg gögn. Þá er lagt til að landlæknir gefi út fyrirmæli um gæðaskrár á heilbrigðissviði, taki við tilkynningum frá heilbrigðisstofnunum og starfsstofum heilbrigðisstarfsmanna um fyrirhugaðan rekstur slíkra skráa og veiti þeim staðfestingu. Jafnframt er gert ráð fyrir að heilbrigðisyfirvöld fái beinan rafrænan aðgang að sjúkraskrám við meðferð kvörtunar- og kærumála og rannsókn atvika í heilbrigðisþjónustu.

Breytingar á lögum og tengd mál: Lög um landlækni og lýðheilsu, nr. 41/2007.

Lög um sjúkraskrár, nr. 55/2009.

Kostnaður og tekjur: Ekki er gert ráð fyrir áhrifum á ríkissjóð.

Aðrar upplýsingar:

Afgreiðsla: Frumvarpið var ekki afgreitt úr nefnd.

Efnisflokkar: Heilsa og heilbrigði: Heilbrigðismál | Lög og réttur: Persónuleg réttindi | Atvinnuvegir: Tölvu- og upplýsingamál

230 | Landlæknir og lýðheilsa og sjúkraskrár (heilbrigðisskrár o.fl.)

Þingskjöl

Umsagnir