Lagt er til að tekin verði upp að nýju svæðaskipting aflaheimilda við strandveiðar sem var afnumin árið 2019. Í stað þess að heimilt sé að stunda veiðar frá öllum landsvæðum þar til heildaraflamagn hefur verið veitt verður aflaheimildum skipt á landsvæði og tímabil. Lagt er til að óveiddar aflaheimildir hvers landsvæðis og tímabils megi flytja yfir á næsta tímabil innan fiskveiðiársins og ráðstafa þeim með aflaheimildum þess tímabils. Þá er gert ráð fyrir að óveiddar aflaheimildir innan fiskveiðiárs verði heimilt að flytja yfir á næsta fiskveiðiár. Gert er ráð fyrir að Fiskistofa stöðvi strandveiðar frá einstökum landsvæðum þegar leyfilegum heildarafla á þeim svæðum er náð.