Markmið: Að einfalda reglur um mannanöfn og afnema eins og unnt er þær takmarkanir sem eru í dag á skráningu nafna, bæði eiginnafna og kenninafna, og auka heimildir til nafnbreytinga. Að jafna rétt manna til notkunar nafna.

Helstu breytingar og nýjungar: Frumvarpið felur í sér endurskoðun laga um mannanöfn. Lagðar eru til víðtækari heimildir til skráningar nafna og kenninafna en núgildandi löggjöf gerir ráð fyrir. Með rýmri heimildum til skráningar nafna er ekki talin þörf á að hafa mannanafnanefnd og er því ráðgert að leggja hana niður. Lagt er til að ekki verði takmörk á fjölda eiginnafna og kenninafna. Einnig er lagt til að felldar verði niður reglur um að eiginnöfn skuli geta tekið íslenska eignarfallsendingu eða hafa unnið sér hefð í íslensku máli. Þá er lagt til að fellt verði brott ákvæði um að nafn megi ekki brjóta í bága við íslenskt málkerfi og að það skuli ritað í samræmi við almennar ritreglur íslensks máls nema hefð sé fyrir öðrum rithætti þess. Gert er ráð fyrir því að hægt verði að taka upp ný ættarnöfn. Loks er lagt til að hætt verði að halda mannanafnaskrá í þeirri mynd sem hún er í dag.

Breytingar á lögum og tengd mál: Um er að ræða ný lög en við gildistöku laganna falla brott lög um mannanöfn, nr. 45/1996, og jafnframt verða breytingar á lögum um aukatekjur ríkissjóðs, nr. 88/1991.

Kostnaður og tekjur: Ekki er gert ráð fyrir áhrifum á ríkissjóð sem nokkru nemur.

Afgreiðsla: Frumvarpið var ekki afgreitt úr nefnd.

Efnisflokkar: Mennta- og menningarmál: Menningarmál  |  Lög og réttur: Persónuleg réttindi