Markmið: Að tryggja að ávallt séu til staðar réttar og áreiðanlegar upplýsingar um raunverulega eigendur svo unnt sé að greina og koma í veg fyrir peningaþvætti og fjármögnun hryðjuverka.

Helstu breytingar og nýjungar: Lagt er til að innleidd verði ákvæði 30. og 31. gr. tilskipunar (ESB) 2015/849, fjórðu peningaþvættistilskipunar ESB. Einnig er lagt til að tekin verði efnislega upp í íslenskan rétt þau ákvæði tilskipunar (ESB) 2018/843, fimmtu peningaþvættistilskipunar ESB, sem breyta framangreindum ákvæðum 30. og 31. gr. Með innleiðingunni er komið til móts við athugasemdir alþjóðlegs vinnuhóps um aðgerðir gegn peningaþvætti og fjármögnun hryðjuverka (e. Financial Action Task Force, FATF) sem fram komu í niðurstöðum úttektar vinnuhópsins á árinu 2017 á stöðu mála á Íslandi. Lagt er til að í fyrirtækjaskrá verði skráðir raunverulegir eigendur þeirra aðila sem falla undir gildissvið frumvarpsins. Lagt er til að skrifstofa fjármálagreininga lögreglu, Fjármálaeftirlitið, ríkisskattstjóri, lögregla, héraðssaksóknari og tollstjóri hafi aðgang að öllum upplýsingum og gögnum um raunverulega eigendur lögaðila. Einnig er gert ráð fyrir að skattyfirvöld hafi aðgang að öllum upplýsingum og gögnum um raunverulega eigendur vegna skatteftirlits, upplýsingaskipta milli landa og skattrannsókna.

Breytingar á lögum og tengd mál: Um er að ræða ný lög en við gildistöku laganna verða breytingar á lögum um fyrirtækjaskrá, nr. 17/2003, og lögum um greiðsluþjónustu, nr. 120/2011.

Kostnaður og tekjur: Verði frumvarpið óbreytt að lögum er gert ráð fyrir að aukin útgjöld sem af því hljótast muni rúmast innan útgjaldaramma málefnasviðs. Heimild til að beita dagsektum og stjórnvaldssektum gæti leitt til aukinna tekna fyrir ríkissjóð en ógerlegt er að segja til um hversu háar slíkar tekjur gætu orðið.

Aðrar upplýsingar:

Afgreiðsla: Samþykkt með minni háttar breytingum en þeirri helstri að gildissvið laganna er skilgreint með almennu orðalagi.

Efnisflokkar: Erlend samskipti: Alþjóðasamningar og utanríkismál  |  Atvinnuvegir: Viðskipti