Markmið: Að stuðla að verndun og aukinni útbreiðslu skóga. Að nýta skóga á sjálfbæran hátt.

Helstu breytingar og nýjungar: Lagt er til að ráðherra gefi út eigi sjaldnar en á fimm ára fresti stefnumótandi landsáætlun í skógrækt. Í kjölfarið verði unnar landshlutaáætlanir til fimm ára í senn sem taki til fjáröflunar og útgjalda af hálfu ríkisins til skógræktar. Gert er ráð fyrir að ræktunaráætlanir skuli unnar fyrir alla skóga sem njóta framlaga úr ríkissjóði og að Skógræktinni sé heimilt að taka þátt í samstarfi um skógrækt. Einnig er gert ráð fyrir að halda skuli skrá yfir þá skóga sem ræktaðir eru á Íslandi. Lagt er til að kveðið verði á um svokallaða þjóðskóga. Enn fremur er lagt til að kveðið verði á um sjálfbærni nýtingar og að árleg felling í skógum skuli aldrei vera meiri en árlegur vöxtur þeirra.

Breytingar á lögum og tengd mál: Um er að ræða ný lög og við gildistöku þeirra falla úr gildi lög um skógrækt, nr. 3/1955, lög um skógrækt á lögbýlum, nr. 95/2006, og lög um skógræktardag skólafólks, nr. 13/1952. Við gildistöku laganna verða breytingar á lögum um landgræðslu, nr. 155/2018.

Kostnaður og tekjur: Samþykkt frumvarpsins hefur ekki kostnaðaráhrif á fjárhagsstöðu ríkissjóðs.

Aðrar upplýsingar: Tillögur að nýjum lögum um skógrækt. Greinargerð starfshóps til umhverfisráðherra með tillögum að efni nýrra skógræktarlaga, júní 2012.

Afgreiðsla: Samþykkt með nokkrum breytingum.

Efnisflokkar: Samfélagsmál: Byggðamál  |  Hagstjórn: Fjárreiður ríkisins  |  Atvinnuvegir: Landbúnaður  |  Stjórnarskipan og stjórnsýsla: Sveitarstjórnarmál  |  Umhverfismál: Umhverfisstjórn og náttúruvernd