Markmið: Mótun heildarlöggjafar um skilyrði handtöku og afhendingar manna, vegna refsiverðrar háttsemi, á milli Íslands, Norðurlandanna og aðildarríkja Evrópusambandsins.

Helstu breytingar og nýjungar: Lagt er til að sameinuð verði í einni löggjöf ákvæði laga nr. 12/2010 (norræn handtökuskipun) og ný lagaákvæði sem leiða af skuldbindingum Íslands vegna evrópsku handtökuskipunarinnar. Lagt er til að tekið verði upp nýtt fyrirkomulag varðandi afhendingu sakamanna milli ríkja sem komi í stað hefðbundins framsalsfyrirkomulags. Gert er ráð fyrir að tímafrestir um málsmeðferð og afhendingu verði styttri en nú er. Ráðuneyti sem fara með dómsmál muni ekki koma að málsmeðferð. Miðað er við að ákæruvaldið eða önnur stjórnvöld í réttarkerfinu gefi út handtökuskipun, taki á móti henni og fjalli um hana ásamt því að taka ákvörðun um hvort orðið skuli við beiðni um afhendingu eða ekki. 

Breytingar á lögum og tengd mál: Lög um handtöku og afhendingu manna milli Norðurlandanna vegna refsiverðra verknaða (norræn handtökuskipun) nr.12/2010.
Lög um framsal sakamanna og aðra aðstoð í sakamálum nr. 13/1984.

Kostnaður og tekjur: Verði frumvarpið óbreytt að lögum er gert ráð fyrir að útgjöld ríkissjóðs aukist um 3,9 milljónir króna.

Afgreiðsla:

Frumvarpið varð óbreytt að lögum.

Efnisflokkar: Erlend samskipti: Alþjóðasamningar og utanríkismál  |  Lög og réttur: Dómstólar og réttarfar  |  Lög og réttur: Löggæsla og eftirlit  |  Erlend samskipti: Norræn málefni  |  Lög og réttur: Persónuleg réttindi