Markmið: Að lækka húsnæðiskostnað efnaminni leigjenda með greiðslu húsnæðisbóta vegna leigu á íbúðarhúsnæði. Þannig verði stuðningurinn jafnari húsnæðisstuðningi við kaupendur íbúðarhúsnæðis innan vaxtabótakerfisins. Frumvarpið er liður í að jafna húsnæðisstuðning hins opinbera við ólík búsetuform.

Helstu breytingar og nýjungar: Lagt er til að félags- og húsnæðismálaráðherra fari með yfirstjórn húsnæðisbóta til leigjenda og Tryggingastofnun ríkisins fari með framkvæmdina. Þannig flyst stjórnsýsla og umsýsla með almennum húsaleigubótum frá ­sveitarfélögum til ríkisins. Greiðsla sérstakra húsaleigubóta því til viðbótar verður eftir sem áður á hendi ­sveitarfélaga. Lagt er til að húsnæðisbætur verði greiddar mánaðarlega líkt og húsaleigubætur og að grunnfjárhæðir taki mið af fjölda heimilismanna óháð aldri.

Breytingar á lögum og tengd mál: Verði frumvarpið að lögum falla úr gildi lög um húsaleigubætur nr. 138/1997.

Kostnaður og tekjur: Verði frumvarpið óbreytt að lögum er gert ráð fyrir að útgjöld ríkissjóðs vegna húsnæðisbóta til leigjenda aukist varanlega um liðlega 2 milljarða kr. á ári og verði nálægt 6,6 milljörðum kr. frá og með árinu 2017 miðað við núgildandi verðlag.

Aðrar upplýsingar: Skýrsla verkefnisstjórnar um framtíðarskipan húsnæðismála. Velferðarráðuneytið, maí 2014.

Afgreiðsla: Frumvarpið varð að lögum með nokkrum breytingum. Varða þær einkum skilyrði og útreikning húsnæðisbóta.

Efnisflokkar: Samfélagsmál: Félagsmál  |  Hagstjórn: Fjárreiður ríkisins  |  Stjórnarskipan og stjórnsýsla: Sveitarstjórnarmál