Markmið: Að breyta ýmsum lögum sem tengjast tekju- eða gjaldahlið ríkissjóðs í samræmi við forsendur fjárlagafrumvarps fyrir árið 2016.

Helstu breytingar og nýjungar: Helstu breytingarnar eru lækkun skatthlutfalls um 0,18 prósentustig í þrepi 1 og um 1,3 prósentustig í skattþrepi 2. Fyrir árið 2017 lækkar skatthlutfall í þrepi 1 aftur um 0,18 prósentustig og þrep 2 fellur út. Verða þá einungis tvö þrep með 22,50% og 31,8% skatthlutfalli. Þessi aðgerð mun lækka tekjur ríkissjóðs um 5,5 milljarða árið 2016 og um 11 milljarða árið 2017. Þá er lagt til að felldir verði niður tollar af öllum vörum öðrum en landbúnaðarafurðum og tilteknum matvælum og mun það kosta ríkissjóð um 2,5 milljarða árið 2016 og 5,7 milljarða árið 2017. Flestar aðrar breytingar eru minniháttar og tengjast framlengingu bráðabirgðaákvæða og gjaldskrárhækkun að undanskildu ákvæði um afnám ívilnunar bílaleiga af vörugjaldi en gert er ráð fyrir að það falli að fullu úr gildi 2017.

Breytingar á lögum og tengd mál: Alls er verið að breyta 22 lögum.

Kostnaður og tekjur: Lækkar tekjur ríkissjóðs um 8 milljarða árið 2016 og tæpa 15 milljarða árið 2017.

Umsagnir (helstu atriði): Fjölmargar athugasemdir bárust og ýmsum atriðum frumvarpsins var mótmælt.

Afgreiðsla: Samþykkt með nokkrum breytingum er varða samsköttun, afnám tolla og auk þess var bílaleiguákvæðinu frestað um eitt ár.

Efnisflokkar: Hagstjórn: Fjárreiður ríkisins  |  Hagstjórn: Skattar og tollar