Markmið: Að skýra ákvæði um réttindi og skyldur borgaranna í samskiptum við Tryggingastofnun ríkisins (TR) og kveða skýrar á um eftirlitshlutverk stofnunarinnar.

Helstu breytingar og nýjungar: Kveðið er á um leiðbeiningar-, upplýsinga-, þagnar- og rannsóknarskyldu TR. Lagðar eru til breytingar varðandi aðila sem upplýsingaskylda hvílir á og tilgreindar eru þær upplýsingar sem afhenda skal stofnuninni í tengslum við afgreiðslu umsókna.

Breytingar á lögum og tengd mál: Lagðar eru til breytingar á lögum um almannatryggingar, nr. 100/2007, lögum um félagslega aðstoð, nr. 99/2007, og lögum um málefni aldraðra, nr. 125/1999.

Kostnaður og tekjur: Ekki er gert ráð fyrir auknum kostnaði ríkissjóðs.

Umsagnir (helstu atriði): Í mörgum umsögnum var tekið undir meginefni frumvarpsins um leiðbeiningarskyldu TR. Meðal þeirra sem gerðu athugasemdir voru Persónuvernd og Ríkisskattstjóri en hann taldi að ákvæði frumvarpsins, um aðgang að gögnum skattyfirvalda, gangi gegn inntaki ákvæðis 117. gr. laga um tekjuskatt nr. 90/2003. Öryrkjabandalag Íslands taldi að of langt væri gengið í skerðingu á friðhelgi einkalífs.

Afgreiðsla: Frumvarpið varð að lögum með þeim breytingum að sett var inn ákvæði um sérstaka upplýsingaskyldu Tryggingastofnunar um vinnslu persónuupplýsinga. Einnig bættust við ákvæði um meðalhóf geymslutíma gagna sem aflað er á grundvelli eftirlits. Við upptalningu aðila sem skylt er að veita Tryggingastofnun upplýsingar bættust ríkislögreglustjóri og Samgöngustofa. Lögin taka gildi 1. febrúar 2014.

Efnisflokkar: Samfélagsmál: Almannatryggingar  |  Samfélagsmál: Félagsmál  |  Lög og réttur: Persónuleg réttindi