Markmið:

Heildarendurskoðun á gildandi löggjöf með tilliti til reynslu af eldri löggjöf og aukinnar alþjóðlegrar samvinnu. Einnig eru með frumvarpinu innleiddar tvær Evróputilskipanir.

Helstu breytingar og nýjungar:

Ýmsar skilgreiningar miða að því að gera löggjöfina skýra og framkvæmd skilvirka. Skilið er á milli efnisflokka sem varða ákvæði um framleiðslu, innflutning, verslun og meðferð vopna. Gert er ráð fyrir að refsingar fyrir brot gegn vopnalöggjöfinni verði hertar. Upptökuákvæði hafa verið endurskoðuð og ný ákvæði eru þar um réttindasviptingu.

Breytingar á lögum og tengd mál:

Ef frumvarpið verður samþykkt falla úr gildi vopnalög nr. 16/1998.

Kostnaður og tekjur:

Ekki er gert ráð fyrir auknum kostnaði fyrir ríkissjóð.

Aðrar upplýsingar:

Frumvarpið felur í sér innleiðingu á tilskipun Evrópuþingsins og ráðsins frá 23. maí 2007 um að setja á markað flugeldavörur, nr. 2007/23/EB, og tilskipun framkvæmdastjórnarinnar frá 4. apríl 2008 um að koma á kerfi til að auðkenna og rekja sprengiefni til almennra nota, nr. 2008/43/EB, sem samþykktar voru af sameiginlegu EES-nefndinni 10. nóvember 2010 með ákvörðun nr. 119/2010.

Forslag til regulering av bombekjemikalier (2012). Direktoratet for samfunnssikkerhet og beredskap.

Umsagnir (helstu atriði):

Margar umsagnir bárust. Nokkrar þeirra lutu að ákvæðum um skotvopn til sportveiða, íþróttaiðkunar og atvinnu en bent var á að ekki væri skilið nægilega vel milli ákvæða um framangreinda notkun og glæpastarfsemi. Gerðar voru athugasemdir við að hljóðdeyfar væru óheimilir samkvæmt frumvarpinu. Skotvopnasafnarar og skotveiðifélög gerðu athugasemdir við takmarkanir á skotvopnaeign. Mannvirkjastofnun telur óljóst hvort efna- og sýklavopn falla undir gildissvið frumvarpsins og hvaða efni teljast sprengi- og íblöndunarefni. Tollstjóri og Ríkislögreglustjóri óskuðu m.a. eftir að bætt yrði við skilgreiningu á heimatilbúinni sprengju.

Afgreiðsla: Frumvarpið var ekki afgreitt úr nefnd.

Efnisflokkar: Erlend samskipti: Alþjóðasamningar og utanríkismál  |  Lög og réttur: Löggæsla og eftirlit  |  Hagstjórn: Skattar og tollar  |  Atvinnuvegir: Viðskipti